Politikani dhe moguli i medias Delyan Peevski deklaroi se do të tërhiqet nga projektet e biznesit në Bullgari duke akuzuar se qe viktimë e një “fushate mediatike të vazhdueshme” kundër tij.
Deputeti, biznesmeni dhe pronari i mediave Delyan Peevski – i cili së fundmi është etiketuar si “ajsbergu i korrupsionit në Bullgari” nga gazeta gjermane Der Spiegel – deklaroi se do të heqë dorë nga projektet e tij të biznesit në Bullgari.
Peevski deklaroi gjithashtu se po tërhiqej nga gara për të blerë asetet e Chimko, një fabrikë kimikatesh të falimentuar të kohës së komunizmit, të cilën kërkoi ta blinte në janar përmes kompanisë së tij NSN Investment.
Deputeti, i cili është zgjedhur nominalisht në emër të partisë Lëvizja për të Drejta dhe Liri, e cila dominohet nga bullgarët me kombësi turke, ia dedikoi vendimin e tërheqjes “presionit të pabazë politik dhe fushatës së vazhdueshme mediatike” kundër tij, e cila, tha ai, ka ushtruar “efekt jashtëzakonisht negativ”, në firmat ku ai ka aksione si dhe mbi kompani me të cilat nuk ka fare të bëjë.
“Unë e gjej të papranueshme për një vend anëtar të BE-së që përmes presionit dhe fushatave negative, reputacioni i mirë i kompanive bullgare diskretitohet dhe aktiviteti i tyre sfidohet,” tha Peevski.
“Unë i lejoj kundërshtarët e mi politikë dhe ata që flasin kundër meje të mësojnë se ata ia kanë arritur synimit të tyre – unë po heq dorë nga pjesëmarja nga projekte biznesi në Bullgari,” shpegoi ai.
Peevski ka qenë prej kohësh një figurë e debatuar në politikën bullgare. Mënyra e tij e të bërit politikë dhe biznes është bërë simbol i korrupsionit për pjesën më të madhe të shoqërisë bullgare.
Në qershor 2013, kur ai u emërua drejtor i Agjencisë Kombëtare të Sigurisë, DANS, vendimi shkaktoi protestat më të mëdha që Sofia kishte parë në më shumë se një dekadë.
Që nga ajo kohë, pas 15 vjetësh sukses ekonomik dhe politik, pronari 35 vjeçar i një perandorie mediatike është vënë nën akuza.
Më 12 shkurt, media turke raportoi se Turqia kishte urdhëruar ndalimin e hyrjes për të si dhe për kryetarin e nderit të partisë së tij, Ahmed Dogan.
Gazeta tukre Sahab e quajti Peevskin një “oligark” dhe e akuzoi atë për kontrabandë cigaresh të prodhimit të Bulgartabac, kompani në të cilën ai kishte 5 për qind të aksioneve.
Hetimet që zbuluan rolin e Bulgartabac në kontrabandën e cigareve në Turqi përmes Lindjes së Mesme janë shfaqur edhe në median bullgare.
Më 16 mars, kompania e cigareve deklaroi se do të ndalonte eksportin drejt Lindjes së Mesme nga 1 prilli, duke akuzuar si fajtor për këtë “fushatën negative mediatike” për vendimin e saj për tërheqjen nga tregu i Lindjes së Mesme ku kjo kompani kishte prani të rëndësishme për dekada.
Dy ditë më vonë, kompania ndërmjetëse e investimeve Capman njoftoi se kishte shitur 368,361 aksione të Bulgartabac Holding – të njëjtin numër aksionesh që mbahet edhe nga kompania e Peevkit, Tobaço Investment.
Edhe karriera e tij politike është aktualisht në telashe.
Të hënën, kryeministri Boyko Borissov deklaroi se për sa kohë Peevski është anëtar i partisë MRF, kjo parti e minoritetit turk nuk mund të bëhet pjesë e koalicionit qeverisës krahas partisë GERB të kryeministrit.
Kjo deklaratë vë në pikëpyetje të ardhmen politike të Peevskit.
