Sektori i energjisë elektrike gjatë vitit të kaluar pati prodhim më të lartë si pasojë e rreshjeve më të bollshme, bëri të ditur INSTAT, ndërsa konsumi i faturuar i vendit qëndroi pothuajse i pandryshuar duke shënuar një rritje minimale prej 1.2 për qind.
Shqipëria përjetoi një vit më të mirë energjetik gjatë vitit 2015, si pasojë e nivelit më të lartë të prurjeve nëpër lumenj, gjë që solli një rritje me 24 për qind të prodhimit në krahasim me vitin 2014 si dhe ulje të importeve neto.
Sipas të dhënave statistikore të publikuara nga INSTAT, prodhimi i energjisë elektrike gjatë vitit të kaluar qe 5.87 miliardë kilovatorë, nga 4.73 miliardë që pati qenë në vitin 2014, duke pësuar një rritje prej 24 për qind. Prodhimi i energjisë nga hidrocentralet publike u rrit me 30.6 për qind ndërsa prodhimi nga hidrocentralet private u rrit me 7.3 për qind. Gjatë vitit të kaluar, prodhimi i energjisë elektrike në impjante private zuri 24 për qind të totalit të prodhimit të vendit.
Konsumi i faturuar në stanjacion
Konsumi total i energjisë elektrike, ku përfshihet konsumi i faturuar për familjet dhe biznesin dhe humbjet në rrjet, ra në 7.27 miliardë kWh nga 7.8 miliardë që pati qenë në vitin 2014. Megjithatë, ky reduktim qe rrjedhojë e reduktimit të humbjeve në rrjet dhe jo e rritjes së konsumit të faturuar.
Sipas të dhënave të INSTAT, konsumi i faturuar total te konsumatorët vendës qe 5.07 miliardë kWh, me një rritje minimale prej 1.2 për qind në krahasim me vitin 2014. Te konsumi i faturuar përfshihet energjia e shitur nga OSHEE te konsumatorët familjarë apo biznes si dhe energjia e konsumuar nga industria e rëndë, e cila e blen energjinë në treg të hapur. Konsumi i familjeve u rrit me 0.8 për qind ndërsa konsumi i bizneseve, ku përfshihet edhe biznesi i madh, u rrit me 1.5 për qind.
Humbjet bien në 30 për qind
Humbjet e energjisë elektrike në rrjetin e transmetimit dhe ranë në 30.2 për qind të energjisë totale të konsumuar në vend, nga 35.7 për qind që qe në vitin 2014. Humbjet totale qenë sërish në nivelin e 2 miliardë kilovatorëve nga 2.6 miliardë që qenë një vit më parë. Ky është niveli më i ulët i humbjeve të raportuara që nga viti 2011.
OSHEE ka kryer një raportim të pashpjeguar mbi ndarjen e humbjeve teknike nga ato joteknike gjatë vitit 2014, duke ulur humbjet e deklaruara joteknike shumë më të mëdha se sa humbjet teknike, gjë për të cilën është kritikuar nga Kontrolli i Lartë i Shtetit.
Humbjet totale llogariten si diferencë e energjisë së hedhur në rrjet dhe energjisë së faturuar. Mes humbjeve totale, humbjet teknike janë të zakonshme dhe pranohen si kosto normale e biznesit të transmetimit dhe shpërndarjes. Ndërsa humbjet joteknike, të cilat njihen më së shumti si vjedhje, nuk janë kosto të pranueshme dhe nuk mbulohen nga tarifat e miratuara. Për vitin 2015, humbjet totale prej 30.2 për qind janë raportuar respektivisht 18.8 për qind humbje teknike dhe 9.2 për qind humbje joteknike. Për vitin 2014, humbjet prej 35.7 për qind qenë ndarë në masën 19 për qind teknike dhe 15 për qind joteknike.
Gjithsesi, dallimi i humbjeve teknike prej atyre joteknike është i vështirë pasi kërkon studime paraprake. Përgjatë viteve të fundit, tendenca ka qenë deklarimi gjithnjë e më i lartë i humbjeve teknike.
