Policia e Tiranës njoftoi se ish-kandidati i pavarur për Bashkinë Vlorë, Vasil Bedinaj, ishte të enjten shenjestra e një atentati të dështuar me eksploziv C-4 në zonën e “Liqenit të Thatë,’ në Tiranë.
“Më datë 24.03.2016, u referuan materialet në Prokurorinë e Rrethit Gjyqësor Tiranë dhe punohet për identifikimin dhe kapjen e autorit, sepse në rreth orës 07:30, tek “Liqeni i Thatë”, shtetasit V. B., 44 vjeç, banues në Vlorë, në automjetin e tij tip “Mercedes Benz”, në pjesën e poshtme i kanë vendosur një objekt të dyshuar si lëndë eksplozive, e llojit C-4, në masën 450 gr,” tha Policia e Tiranës nëpërmjet një njoftimi për shtyp.
“Nga veprimet hetimore rezultoi se lënda eksplozive nuk është shpërthyer për arsye të paqarta, pasi kapsolla detonatore e vendosur brënda lëndës plasëse ka bërë eksplodim,” policia shtoi.
Bedinaj, i cili është pronari i hotel Regina në Radhimë dhe i agjencisë turistike Regina Travel, kandidoi si kandidat i pavarur për bashkinë e Vlorës në zgjedhjet e 21 qershorit 2015. Prej vitit 2009 ai është kryetar i Shoqatës së Operatorëve Turistik për Jugun e Shqiperisë “ATA”.
Në zgjedhjet vendore ai u përball me Dritan Lelin e Partisë Socialiste nga Aleanca për Shqipërinë Europiane dhe Genc Deromemaj të Partisë Demokratike, pjesë e Aleancës Popullore për Punë dhe Dinjitet.
Në një të intervistë për BIRN gjatë fushatës Bedinaj kishte identifikuar varfërinë dhe politikat e dështura publike si problemin më madhor me të cilën përballej Vlora.
“Problemi më i madh i Bashkisë Vlorë është varfëria e shkaktuar nga papunësia, e shkaktuar nga politikat e dështuara publike që kanë tkurrur biznesin vlonjat dhe kanë çuar drejt falimentit shumë investime serioze,” Bedinaj tha.
Rezultatet e këtyre zgjedhjeve nxorën fitues në garën për kryetar bashkie Z. Dritan Leli të Aleancës për Shqipërinë Europiane, me 61.70% të votave.
Në Janar Ministri i Brendshëm Sajmir Tahiri deklaroi se gjatë vitit 2015, numri i vrasjeve në Shqipëri është “më i ulëti që nga koha e komunizmit”, por një numër rrëmbimesh, atentatesh me ekszploziv dhe vrasjesh të stilit mafioz në Durrës, Fier dhe Vlorë vunë në pikëpyetje këtë sukses historik.
