Qeveria serbe tha se vendimi që dënon Radovan Karaxhiçin nuk duhet të përdoret për të sugjeruar se të gjithë serbët janë kolektivisht fajtorë dhe u zotua se do të vazhdojë të mbështesë serbët në Bosnje.
Ministri serb i drejtësisë Nikola Selakoviç ditën e premte tha se serbët në Serbi dhe në entitetin serb në Bosnjë, Republikën Srpska, nuk duhet të fajësohen për krimet që iu atribuan Karaxhiçit me vendimin që dha Gjykata e OKB-së.
“Pas vendimit të Gjykatës së Hagës për presidentin e parë të Republikës Srpska, është e papranueshme që t’ia atribuojë fajin disa popujve të caktuar për krimet e kryera nga individë,” tha Selakoviç një konferencë shtypi pas një seance të jashtëzakonshme të qeverisë në Beograd.
“Ne nuk do të lejojmë që dikush ta përdorë vendimin si një arsye për të drejtuar gishtat nga ne dhe populli ynë, dhe theksojmë se ky vendim nuk mund të përdoret për të prishur lirinë dhe mbijetesën e popullit tonë në Republikën Srpska,” tha ai.
Gjykata Penale Ndërkombëtare për ish-Jugosllavinë e shpalli ish-presidentin serb të Bosnjës,Radovan Karaxhiç, të enjten fajtor për nga disa nga krimet më të rënda në Evropë që nga Lufta e Dytë Botërore dhe e dënoi atë me 40 vjet burg.
Ai u dënua për gjenocidin e Srebrenicës në vitin 1995, terrorizim të popullsisë së Sarajevës, persekutim dhe shfarosjen e boshnjakëve dhe kroatëve në 20 komuna në të gjithë vendin dhe marrjen peng të paqeruajtësve të OKB-së.
Por ai u lirua nga akuzat për gjenocid në shtatë komuna të tjera boshnjake në vitin 1992.
Selakoviç tha se “çdo krim duhet të dënohet”, por shtoi se qeveria serbe nuk dëshiron të reagojnë ndaj vendimeve specifike të dhëna nga gjykata e OKB-së.
Por ai tha se “pas kaq vitesh ekzistencë të kësaj gjykate ka një shije të hidhur”, sepse njerëzit që kryen krime kundër serbëve nuk janë dënuar.
Kryeministri serb Aleksandër Vuçiç – i cili organizoi një miting proteste në vitin 2008, kur Karaxhiç u dërgua në Hagë – gjithashtu paralajmëroi të enjten para marrjes së vendimit se ai nuk do të lejonte që vendimi i gjykatës së OKB-së të përdorej për të shkatërruar Republikën Srpska.
“I paralajmëroj ata që mendojnë se mund të përdorin vendimin e sotëm kundër ish-presidentit të Republikës Srpska për ndonjë lloj sulmi politik apo të çfarëdolloj tjetër ndaj Republikës Srpska, që në përputhje me Marrëveshjen e Dejtonit, Serbia nuk mund, nuk duhet dhe nuk do ta lejojë këtë,” tha Vuçiç.
Të enjten, rreth një mijë njerëz u mblodhën në Beograd në një protestë të organizuar nga i pandehuri për krime lufte Vojisllav Sheshel në mbështetje të Radovan Karaxhiçit.
Duke komentuar vendimin, Shesheli tha se Karaxhiçi ishte i pafajshëm dhe se u dënia vetëm se ai ishte një lider serb.
“Vendimi për Radovan Karaxhiçin është një vendim për të gjithë popullin e Serbisë, historinë dhe kombin. Vetëm serbët janë fajtorë për të gjitha të këqijat në Ballkan,” tha Shesheli.
Serbia mohon çfarëdolloj përfshirje në krime lufte në Bosnjë dhe Hercegovinë. Qeveria e Beogradit gjithashtu mohon se masakrat e më shumë se 7,000 boshnjakëve nga Srebrenica përbënin gjenocid, pavarësisht vendimeve nga gjykatat ndërkombëtare dhe ato vendase.
Marko Attila Hoare, një historian britanik në Universitetin Kingston, tha për BIRN se gjykimi i Karaxhiçit “përcaktonte përfundimisht natyrën kriminale të lidershipit rebel serb të Bosnjës gjatë kohës së luftës”, por nuk implikonte Serbinë.
“Asnjë zyrtar i Serbisë ende nuk është dënuar nga Gjykata e Hagës për krime lufte në Bosnjë dhe Hercegovinë, kështu që zinxhiri i përgjegjësisë penale ende përfundon në (fortesën e Karaxhiçit gjatë kohës së luftës) Pale dhe jo në Beograd,” tha Hoare.