Rreth 100 aktivistë ballkanas për të drejtat e njeriut nënshkruan një letër duke mbështetur gazetaren franceze Hartmann, e cila u arrestua në Gjykatën e Hagës për një gjobë të papaguar për publikimin e informacioneve sekrete të gjykatës.
Rreth 100 aktivistë të të drejtave të njeriut dhe gazetarë nga i gjithë Ballkani shprehën mbështetje për Hartmann të hënën, pasi policia e OKB-së e arrestoi gazetaren franceze jashtë Gjykatës Ndërkombëtare për ish-Jugosllavinë në Hagë para dhënies së vendimit për Radovan Karaxhiçin për krime lufte javën e kaluar.
Hartmann u dënua për shpërfillje nga gjykata e OKB-së për krime lufte në vitin 2011, pasi ajo përdori disa nga dokumentet e gjykatës në një libër dhe një artikull, duke zbuluar detajet e një vendimi nga gjykata për të fshehur dokumentet në lidhje me përfshirjen e Serbisë në masakrat e Srebrenicës në vitin 1995.
Por aktivistët thanë se Hartmann, e cila ishte gjithashtu zëdhënëse e prokurorisë së Gjykatës së Hagës, nuk duhet të dënohet se u përpoq të ekspozonte të vërtetën.
“Jemi shumë të bindur se veprimi i Florence Hartman nuk është në kundërshtim me drejtësinë, edhe nëse kjo bie ndesh me statutin e Gjykatës së Hagës. Kjo është arsyeja pse ne e mbështesim angazhimin e saj në luftën për të vërtetën dhe përpjekjet e saj që arkivat e shtetit të hapen,” thuhej në letër.
Në librin e sa Paix et Chatiment (Paqe dhe Ndëshkim), i cili u botua në vitin 2007, Hartmann botoi dokumente që dukeshin se vërtetonin implikimin e Serbisë në gjenocidin në Srebrenicë ishin vulosur nga Gjykata e Hagës.
Ajo nuk e tregoi përmbajtjen e dokumenteve, por këmbënguli se njerëzit që vuajtën për shkak të masakrave kishin të drejtë të dinin mbi vendimin e gjykatës për t’i mbajtur sekret dokumentet.
Hartmann fillimisht u gjobit me 7,000 euro, por dënimi më vonë u shndërrua në shtatë ditë në burg pasi gjykata pohoi se gjoba nuk ishte paguar. Në dhjetor 2011, Franca refuzoi një kërkesë për ekstradimin e Hartmann.
Aktivistët këmbëngulën se ajo ishte dënuar “për shkak të një veprimi që kontribuonte në zbulimin e së vërtetës dhe për shkak të vendimit të saj të guximshëm për të dalë kundër praktikës së fshehjes së dokumenteve nga publiku, e cila po ndodh për shkak të interesave të shteteve”.
Ndërsa policia e OKB-së u përpoq të arrestonte Hartmann-in të enjten e kaluar, të afërmit e viktimave boshnjake të luftës dhe të tjerë që ishin në gjykatë për të dëgjuar vendimin e Karaxhiçit u përpoqën të krijoni rrathë përreth saj dhe të mos i lejonin policët ta merrnin atë, por përpjekja dështoi.
Avokati i Hartmann tha për mediat se ajo po mbahet në izolim deri të paktën të martën për shkak të pushimeve të Pashkës.
Gazeta Guardian raportoi Hartmann të ketë thënë se ajo ishte në një pozitë të çuditshme “teksa shikonte të pandehurin serb të Bosnjës për krime lufte Ratko Mlladiç duke shëtitur nëpër oborr dhe të shoqërohej me të burgosurit e tjerë, ndërsa ajo mbahej e mbyllur në një qeli”.
BIRN kontaktoi me Gjykatën e Hagës për një koment, por nuk mori përgjigje nga ana e tyre deri në çastin e publikimit të lajmit.
Hartmann është një ish-korrespondente e Ballkanit për gazetën franceze Le Monde. Në vitin 2000 ajo shkoi të punonte për Gjykatën si zëdhënëse e kryeprokurorit dhe qëndroi atje deri në vitin 2006.