Kryeministri i Serbisë deklaroi se qeveria e tij nuk do ta lejojë Prishtinën të marrë kompleksin minerar të stërmadh të Trepçës në Kosovën e veriut, por një ministër i Kosovës e akuzoi atë për fjalë politike boshe.
Kryeministri i Serbisë Aleksandar Vuçiç deklaroi të dielën se miniera e Trepçës, një kompleks industrial i stërmadh dhe me potencial fitimprurës në Mitrovicë, do të mbetet në kontrollin e Beogradit.
Gjatë një vizite në Kosovën e veriut, Vuçiç tha se rrjeti masiv i dhjetëra minierave aktive dhe inaktive të zinkut dhe plumbit qenë me rëndësi jetike për mbijetesën e popullsisë serbe në këtë zonë.
“Ajo që ne kemi frikë është një përpjekje [nga autoritetet e Prishtinës] në të ardhmen që të miratojnë një ligj speficik i cili do ta transformojë Trepçën në pronë publike të të ashtuquajturës Republikë të Kosovës,” tha Vuçiç para një mitingu në Leposaviç.
“Pa dyshim ne do të ngrihemi dhe kundërshtojmë këtë gjë politikisht,” shtoi ai duke u betuar se do ta ngrejë çështjen në bisedimet e ndërmjetësuara nga BE mes Prishtinës dhe Brukselit.
Vuçiç pretendoi se përpjekje të mëparshme të qeverisë së Kosovës për të vendosur kontrollin mbi minierat qenë ndaluar nga përpjekjet diplomatike të Serbisë.
Ai tha se Beogradi do të kërkojë për investime të reja për minierat, të cilat kanë qenë një punëdhënës i madh në kohën e Jugosllavisë.
Gjithsesi, ministrja e Kosovës për dialog, Edita Tahiri, i tha BIRN se komentet e Vuçiç qenë retorikë politike, pjesë e fushatës së tij për zgjedhjet parlamentare të Serbisë.
Tahiri tha se nuk kishte vend për të diskutuar Trepçën në Bruksel duke shtuar se ky qe “kufiri” për Prishtinën dhe se i qe bërë e qartë Vuçiçit sa herë që ai ka kërkuar diskutime për të.
“Pozicioni jonë për Trepçën dhe asetet shtetërore të Kosovës është bërë i qartë në Bruksel. Shteti dhe populli i Kosovës kanë të drejta sovrane mbi asetet e tyre,” tha Tahiri për BIRN.
Vuçiç tha gjithashtu se Serbia është nën presion nga Brukseli për të dorëzuar liqenin Gazivodë, i cili gjendet përgjatë kufirit mes Serbisë dhe Kosovës por këmbënguli se ai nuk do të bie kurrë dakord për këtë me Prishtinën.
Analisti me bazë në Mitrovicë Nexhmedin Spahiu argumentoi gjithashtu se komentet e Vuçiçit, njësoj si vizita e tij në Kosovë, qenë pjesë e fushatës së tij për zgjedhjet e 24 prillit.
“Ne nuk po presim deklarata më të moderuara nga sa kemi dëgjuar,” tha Spahiu për BIRN.
Vizita e Vuçiç të dielën u parapri nga shpërthimi i një granate dore në një sallë sportesh në Zubin Potok natën para se ai të mbante një fjalim aty. Nuk pati raportime për të lënduar.
Kryeministri serb iu përgjigj sfidues shpërthimit.
“Ata që shpërthejnë bomba dhe qëllojnë me armë, duke menduar se do të më frikësojnë dhe do të më ndalojnë të vi në Kosovë, duhet të dinë se vetëm një Serbi e fortë mund të mbrojë interesat e popullit tonë në Kosovë,” tha Vuçiç.
