Çmimi i ulët në tregun ndërkombëtar dhe mungesa e investimeve solli rënie të menjëhershme të prodhimit në fushën naftëmbajtëse të Patos-Marinzës me mbi 12 për qind gjatë tremujorit të parë ndërsa tendenca është negative.
Kompania e nxjerrjes së naftës Bankers Petroleum njoftoi sot se prodhimi mesatar ditor për tremujorin e parë të këtij viti ra në rreth 17 mijë fuçi në ditë, nga 19,800 fuçi që qe në të njëjtën periudhë të vitit të kaluar. Prodhimi i naftës ra me mbi 12 për qind si pasojë e ndërprerjes së investimeve për shpimin e puseve të reja, masë që u mor dhjetorin e kaluar për shkak të çmimeve shumë të ulëta të shitjes së naftës në tregun ndërkombëtar.
“Çmimi mesatar i naftës së Bankers ishte mesatarisht 21,07 dollarë për fuçi duke përbërë 62% të Brentit prej 33,89 dollarë për fuçi, kundrejt një mesatareje prej 33.62 dollarë për fuci që ishte në tremujorin e katërt 2015,” tha Bankers në një njoftim për shtyp.
Një vit më parë, çmimi i shitjes së naftës së Bankers qe 39.6 dollarë për fuçi. Rënia e çmimit mesatar prej 46 për qind i shtohet rënies së prodhimit.
“Çmimet e shitjes ishin më ulët se parashikimi si pasojë e reduktimit të përkohshëm të tyre gjatë muajit Shkurt ku edhe eksportuesi i naftës kërkoi ulje të çmimeve si pasojë e nivelit të Brent prej 30 dollarë/fuçi. Shitjet e naftës gjatë muajit mars u rikuperuan si pasojë e rritjes së çmimit të Brent dhe ne presim përmirësime të mëtejshme gjatë tremujorit të dytë ku pritet edhe rritje e kërkesës për naftë të rëndë në tregun e jashtëm por edhe atë vendas,” thotë Bankers.
Gjithsesi, parashikimi është që përgjatë viteve të ardhëshme, çmimi referencë i naftës në tregun ndërkombëtar i njohur si Brent të qëndrojë në 40-50 dollarë për fuçi, si pasojë e pranisë së madhe të kapaciteteve prodhuese të lira, të cilat mund të riaktivizohen në çdo kohë në rast se çmimi shënon një rritje mbi 40 dollarë për fuçi.
Nafta shqiptare, e cila ka kosto të lartë nxjerrjeje, për rrjedhojë, ka gjasa që do të vijojë të reduktohet si pasojë e mungesës së shpimeve.
“Si pasojë e çmimit të ulët të naftës, Bankers ka vendosur të shtyjë aktivitetin e shpimit në fillim të vitit me qëllim mbrojtjen e bilancit financiar të kompanisë. Shpimi do të rifillojë sapo çmimet e naftës të përmirësohen,” thuhet më tej në deklaratë.
Bankers përgjatë viteve të fundit zinte 3 deri në 4 për qind të prodhimit të brendshëm bruto të Shqipërisë dhe pakësimi i prodhimit të naftës nga kjo kompani pritet të japë një ndikim domethënës negativ në ritmin e rritjes ekonomike. Sakaq rënia e çmimit të naftës ka shkaktuar një rënie të konsiderueshme të eksporteve për shkak se nafta zinte më herët deri në një të tretën e të gjitha eksporteve.
