Përplasjet e dhunshme mes refugjatëve dhe forcave të sigurisë në kufirin Greqi-Maqedoni kanë hapur një mosmarrëveshje të re diplomatike mes Shkupit dhe Athinës.
Athina ka dërguar dy notë-protesta diplomatike në Shkup të hënën, duke akuzuar forcat e sigurisë maqedonase se kanë përdorur forcë të tepruar kundër refugjatëve gjatë përleshjeve që shpërthyen një ditë më parë pasi ata u përpoqën të kalojnë kufirin.
Autoritetet maqedonase kanë bërë kundër-akuza, duke thënë se policia greke nuk ka bërë asgjë për të parandaluar disa mijë refugjatë që u përpoqën të hynin me forcë në territorin e Maqedonisë të dielën.
Shefi i zyrës ndërlidhëse të Greqisë në Shkup, ambasadori Theoharis Lalakos, ka dërguar dy nota proteste të hënën në mëngjes, tha ministria e jashtme greke.
“Përdorimi i dhunës në asnjë mënyrë nuk kontribuon në zgjidhjen e problemit të refugjatëve dhe është në kundërshtim të drejtpërdrejtë me dispozitat përkatëse të së drejtës ndërkombëtare dhe humanitare,” tha ministria greke.
Ajo i kërkoi Maqedonisë të “shfaqë përgjegjësinë e duhur, vetëpërmbajtje dhe seriozitet”, ndërsa përballet me situata të tilla në të ardhmen.
Ministria e brendshme e Maqedonisë, tha për BIRN të hënën, megjithatë, se policia greke nuk ka bërë asgjë për të parandaluar përshkallëzimin e situatës.
“Jemi vërtet të habitur nga reagimi grek në një situatë në të cilën forcat e policisë greke vetëm qëndruan atje dhe nuk kanë bërë asgjë për të ndihmuar vendosjen e rendit dhe ligjit, si dhe për të parandaluar këta njerëz nga sulmi i kufirit tonë”, ka thënë një burim nga ministria e brendshme e Maqedonisë në kushte anonimiteti.
Një total prej 23 oficerësh të sigurisë të Maqedonisë u plagosën gjatë incidenteve të së dielës në kufirin jugor me Greqinë. Mjekët pa Kufij, një organizatë mjekësore, raportoi se po trajtohen të paktën 300 persona pas përleshjeve, gjatë së cilës u përdorën me gaz lotsjellës dhe plumba gome.
Ministria e jashtme e Maqedonisë është ankuar gjithashtu duke pretenduar mosbashkëpunim nga ana e policisë greke.
“Autoritetet maqedonase kërkuan angazhimin e autoriteteve policore greke, ndërsa sulmet e dhunshme nga territori grek vazhduan në terren. Ka pasur kërkesa të vazhdueshme për bashkëpunim, shkëmbimi informacioni dhe veprim parandalues për të përmbajtur trazirat e dhunshme të emigrantëve dhe kalimin e paligjshëm të kufirit nga Greqia në territorin e Maqedonisë,” tha ministria në një deklaratë.
Përleshjet në kufirin greko-maqedonas, në afërsi të kampit të refugjatëve Idomeni, filloi herët të dielën, pas një përpjekje të dështuar për të negociuar me një grup të refugjatëve që këmbëngulnin për të hyrë në Maqedoni.
Një grup prej rreth 1.000 deri 2.000 persona, kryesisht të rinj kanë filluar protestën në pikën kufitare, duke hedhur gurë ndaj forcave të sigurisë. Policia tha se u përgjigj me gaz lotsjellës.
Mjekët pa Kufi tha megjithatë se kishte trajtuar njerëz me plagë që dukej të ishin qenë shkaktuar nga plumbat e gomës.
Gjatë përleshjeve, një pjesë e gardhit kufitar me tela me gjemba të Maqedonisë u prish, por policia tha se i kishte penguar refugjatët nga hyrja në Maqedoni.
Më vonë gjatë ditës, përleshjet shpërthyen përsëri kur një grup prej rreth 500 deri në 1.000 njerëzish, jo shumë larg nga vendi i incidentit të parë, arritën të prishnin gardhin me tela me gjemba dhe u përleshën me policinë. Pas disa orësh, grupi u tërhoq në drejtim të Greqisë.
Situata u qetësua në mbrëmje, kur refugjatët u kthyen në territorin grek. Autoritetet maqedonase kanë raportuar se situata të hënën në mëngjes ishte më e qetë.
Rreth 11.000 njerëz kanë ngecur për disa javë në Kampin Idomeni pasi nuk janë në gjendje të kalojnë kufirin maqedonas dhe të udhëtojnë më në veri drejt Europës qendrore dhe perëndimore.
Vendet e Ballkanit i mbyllën rrugën emigrantëve në mars, duke krijuar një ngushtim të mundshëm të refugjatëve në Greqi.
