Kryeministri Edi Rama takoi presidentin Barack Obama dhe zv.presidentin Joe Biden në Shtëpinë e Bardhë-një vizitë që u zhvillua në frymën e 25 vjetorit të rivendosjes së marrëdhënieve diplomatike.
Para se të hynte në Shtëpinë e Bardhë, kryeministri Edi Rama e quajti takimin me presidentin amerikan, Barack Obama dhe zv.presidentin Joe Biden “një kulmim dhe moment shumë i rëndësishëm për dy vendet”. Vizita e paralajmëruar e tij në Shtëpinë e Bardhë nisi në 17:50 të së enjtes (11:50 me orën lokale).
Sipas axhendës së publikuar në faqen zyrtare të Presidencës amerikane, Rama zhvilloi një takim zyrtar dypalësh me zv.presidentin amerikan, Joe Biden në sallën Roosevelt. Në fund të takimit, kryeministri parashikohej të shtrëngonte duart edhe me presidentin Obama.
“Pool spray”, një term gazetaresk i përdorur për eventin ku presidenti i Shteteve të Bashkuara takon liderin e një shteti tjetër u zhvillua gjithashtu në sallën Roosevelt, në praninë e medias.
Pas daljes nga Shtëpia e Bardhë, Rama tha për Zërin e Amerikës se takimet u zhvilluan në një atmosferë miqësore. Ai konfirmoi se në fokus të bisedimeve ishin projekti i mësimit të fesë në shkolla dhe reforma në drejtësi.
Ambasadori i Shteteve të Bashkuara në Tiranë, Donal Lu, i cili shoqëron kryeministrin Rama në këtë vizitë u shpreh i lumtur për takimin Rama-Obama, përmes një statusi në Facebook.
“…kjo vizitë paraqet një tjetër mundësi për të shprehur vlerësimin për të gjithë shqiptarët për miqësinë e fortë dhe bashkëpunimin e palëkundur midis qeverive tona dhe popujve tanë në lidhje me një gamë të gjerë çështjesh të rëndësishme, të tilla si kundërvënia ndaj ekstremizmit të dhunshëm, koalicioni kundër ISIS dhe reforma historike në drejtësi,” shkroi Lu në Facebook.
Vizita e kryeministrit Rama në Shtëpinë e Bardhë, e dyta e një zyrtari të lartë të Shqipërisë pas asaj të ish-presidentit Sali Berisha në vitin 1992, zhvillohet në frymën e 25 vjetorit të rivendosjes së marrëdhënieve diplomatike mes Shqipërisë dhe Shteteve të Bashkuara të Amerikës.
Dy muaj më parë, kjo vizitë u parapri nga ardhja e sekretarit amerikan të Shtetit, John Kerry në Tiranë.
Takimi me presidentin Obama kulmon vizitën zyrtare të kryeministrit Edi Rama në Nju Jork dhe Uashington, gjatë së cilës ai zhvilloi një sërë takimesh të nivelit të lartë. Megjithatë, ishin deklaratat e ashpra dhe “jo-diplomatike” të Ramës kundër kandidatit Donald Trump ato që tërhoqën vëmendjen e medias ndërkombëtare.
Në një intervistë për CNN të mërkurën, Rama tha se “kandidimi i mundshëm i Donald Trump do të dëmtonte Shtetet e Bashkuara të Amerikës dhe botën demokratike”. Rama e përsëriti këtë shqetësim, edhe pasi gazetari i njohur, Richard Quest i kujtoi atij se kortezia diplomatike nuk i lejonte komentet për zgjedhjet e vendeve të tjera.
Një deklaratë të ngjashme, Rama e bëri edhe për revistën prestigjoze Foreign Policy, ku e cilësoi kandidatin Trump si “turpin e civilizimit tonë”.
