Një grup studentësh të Universitetit të Tiranës bënë thirrje për bojkotim të zgjedhjeve universitare dhe shprehën zhgënjimin e tyre për situatën aktuale të arsimit të lartë në Shqipëri.
Dhjetëra studentë të universitetit të Tiranës, organizuar nga lëvizja “Për Universitetin” protestuan të mërkurën përpara Korpusit kundër zgjedhjeve universitare, duke i quajtur ato një farsë burokratike.
Protestuesit bënë thirrje për bojkotim të zgjedhjeve universitare nga studentët, zëri i të cilëve sipas ligjit të ri të arsimit të lartë ka vetëm 10 për qind të peshës, ndërsa stafi akademik ka 90 për qind të vendimmarrjes. Vetëm për Universitetin e Tiranës pritet të përfshihen në proces rreth 800 pedagogë dhe 40 mijë studentë.
Ata mbanin pankarta si “Bojkoto”, “Arsim publik falas”, “Përfaqësimi është në krizë”, “Arsimi nuk është luks” dhe “Jemi studentë, jo klientë”
“Jemi mbledhur në këtë ditë të errët të demokracisë universitare për të shprehur kundërshtimin tonë ndaj farsës zgjedhore, ku zgjedhja e cilitdo prej kandidatëve në listë nuk do të përbënte zgjidhje për universitetin, por fundosje të mëtejshme të tij, ku e njëjta burokraci e lodhur universitare synon riforcimin e pushtetit të saj”, thanë studentët protestues në deklaratën e tyre.
“Kjo nuk është demokraci, por burokracia që po shtyp çdo të drejtë studentore. Prej 25 vitesh na qeverisin të njëjtët klientë dhe të njëjtët burokratë”, tha në protestë Klodi Leka, një student aktivist.
“Sot është koha që të vendosim në vend demokracinë e shkelur nga klientelat private,” shtoi ai.
Protestuesit kritikuan gjithashtu urdhrin e ministrisë së arsimit për pajisjen me certifikatë të gjuhës së huaj të të gjithë studentëve përpara nisjes së studimeve master, duke argumentuar se kjo rëndon mbi kostot e arsimimit të tyre.
“Bojkotojmë sepse sot në votime kemi vetëm një alternativë: të zgjedhim të njëjtën kastë që ka shkatërruar universitetin. Vizioni i vetëm i kësaj kaste është të rrisë tarifat dhe të privatizojë universitetet,” tha Arlind Qori, profesori i universitetit të Tiranës.
Studentët e Fakultetit të Gjeologjisë dhe Minierave, të cilit ishin pjesë e protestës, kërkuan që godina e tyre të rikonstruktohej dhe të vazhdojë të shërbejë si ambient për studimet e tyre.
Studentët protestues performuan gjithashtu një votim simbolik, ku hodhën votën e tyre kundër situatës aktuale të universiteteve në Shqipëri.
Lëvizja “Për Universitetin” që proteston prej gati dy vjetësh për reformimin e universitetit publik në mënyrë që t’i japë më shumë të drejta studentëve dhe të jetë falas për të gjithë, paralajmëroi përshkallëzim të protestave.
Analiza: Zgjedhjet universitare, mes akuzave për kërcënim dhe indiferencës së studentëve