Gjatë sezonit 2015-2016 të ligës boshnjake të futbollit, klubet e vendit u desh të paguanin një total prej më shumë se 140,000 eurosh në gjoba, shumë për përdorim thirrjesh dhe sloganesh nacionaliste nga ana e tifozëve të tyre.
Komisioni disiplinor i Federatës së Futbollit të Bosnjës tha BIRN se klubet janë dënuar gjatë sezonit të sapo përfunduar të vitit 2015-2016 me gjoba që arrijnë në rreth 140,000 euro për shkelje rregulloresh, përfshirë thirrje nacionaliste, raciste dhe politike nga ana e tifozëve.
Sipas Federatës së Futbollit, klubi që ka akumuluar më shumë gjoba është Klubi i Futbollit i Sarajevës, i cili u urdhërua të paguajë 22,000 euro.
Klubi me bazë në Tuzla, Sloboda, vinte në vend të dytë me një total gjobash prej 17,000 eurosh, i ndjekur nga Zrinjski nga Mostari, Zeljeznicari nga Sarajeva dhe klubi Borac me bazë në Banja Luka.
Të dhënat janë për të gjitha gjobat e marra gjatë sezonit, por komisioni disiplinor tha se ai ka vënë gjoba shumë të rënda për “mesazhe apo thirrje nacionaliste, raciste apo politike”.
Klubet me më shumë gjoba për këto shkelje janë Rudari nga Prijedori, nga Çelik nga Zenica dhe Slavija nga Sarajeva lindore.
Rudari është gjobitur disa herë gjatë 12 muajve të fundit për thirrje nacionaliste nga ana e fansave të tij. Pas dy gjobave që gjithsej arrijnë në rreth 6,000 euro, klubi u urdhërua të luante dy ndeshje me dyer të mbyllura, pa tifozë.
Dënimet erdhën pasi tifozët e Rudarit valëvitën flamuj me mesazhe politike apo nacionaliste dhe thirrën emrat e të dënuarve ose të të pandehurve për krime lufte. Ata mbanin gjithashtu flamujt e entitetit serb të Bosnjës, Republika Srska, dhe të Serbisë.
Komisioni disiplinor i Federatës së Futbollit tha se që nga fillimi i sezonit 2015-2016, mbajtja e flamujve nuk konsiderohej më shkelje.
“Pas shumë problemesh, ramë dakord që flamujt nuk do të sanksionohen më,” tha Mehmed Spaho, një anëtar i komisionit disiplinor.
“Klubet e Republikës Srpska shpesh i kanë kundërshtuar tifozët e Federatës që vinin me flamuj dhe zambakë. Megjithatë, mbajtja e atij flamuri nuk mund të sanksionohet duke qenë se ai ishte flamuri zyrtar i Bosnjës dhe Hercegovinës në vitin 1992. Ai nuk duhet të ngatërrohet me flamurin e Ushtrisë Boshnjake, i cili është ndryshe,” tha Spaho.
“E njëjta situatë vlen edhe për flamujt e Serbisë, Kroacisë ose Republikës Srpska. Ata janë flamuj zyrtare, kështu që konsiderohen të pranueshëm,” shtoi ai.
Spaho tha se që nga fillimi i sezonit 2015-2016, ka pasur zero tolerancë për mesazhe politike apo nacionaliste.
FC Celik nga Zenica u ndëshkua dy herë gjatë sezonit të kaluar për thirrje raciste. Tifozët e tyre abuzuan me Germain Kouadi nga Bregu i Fildishtë, i cili luante për Travnikun, dhe Harmonia Ikande nga Nigeria, i cili luante për Sarajevën.
Klubi u gjobit me një total prej rreth 5,000 eurosh.
Slavija nga Sarajeva lindore u gjobit me 1,750 euro për thirrje mbi krimet e luftës gjatë ndeshjes së tyre me klubin Zeljeznicar nga Sarajeva.
Megjithatë, gjoba më e madhe e vetme këtë vit është paguar nga Shoqata e Futbollit të Bosnjës, pasi UEFA e urdhëroi atë të paguante 18,000 euro për shkak se tifozët boshnjakë kënduan këngë raciste dhe anti-semite gjatë një ndeshje të ekipit kombëtar kundër Izraelit në qershor të vitit 2015 në Zenicë.
