Filiali rumun i kompanisë së njohur softuer HP dhe shefat e sigurimit shëndetësor janë akuzuar për shkelje të ligjit për një kontratë, që dyshohet se është fryrë dhe i ka kushtuar shtetit 17 milionë euro.
Drejtoria rumune Kundër Korrupsionit, DNA, tha të hënën se HP Rumania dhe ish-krerët e Dhomës Kombëtare të Sigurimit Shëndetësor, CNAS, po ndiqen penalisht në lidhje me kontratën e IT.
CNAS akuzohet se i ka paguar çmime të fryra HP-së në Rumani për ndihmë teknike për sistemin e saj kompjuterik.
Sipas prokurorëve kundër korrupsionit, nga vitit 2007 deri në 2009, CNAS nënshkroi ndryshimet në një kontratë ekzistuese me HP Rumaninë, duke rënë dakord për t’i paguar firmës 760 deri në 804 euro për person në ditë.
Puna më pas thuhej se nënkontraktohej nga HP, e cila paguante vetëm 200 euro në një orë për ta bërë atë.
Prokurorët thanë se zyrtarët CNAS nuk mbajtën një tender publik për blerjen e asistencës teknike dhe nuk i kishin vlerësuar më parë nevojat reale të institucionit të sigurimit shëndetësor.
Kostoja në buxhetin e shtetit është vlerësuar në rreth 17 milionë euro.
Kjo është çështja e dytë e madhe e korrupsionit për këtë vit në lidhje me blerjet e mbiçmuara të shërbimit IT nga institucionet shtetërore.
Në fund të marsit të këtij viti, një ish-ministër dhe tre të tjerë u dënuan me burg për korrupsion në një rast lidhur me licencat softuare të Microsoft.
Në një zhvillim tjetër lidhur me sistemin shëndetësor, kryeprokurorja e DNA, Laura Kodruta Koveshi tha të hënën se firmat e huaja janë përfshirë në aktivitete të korrupsionit në vend.
“Ka kompani të huaja të përfshira në korrupsion në sistemin shëndetësor. Prandaj, për DNA është prioritet hetimi i dy personave juridikë rumunë dhe të huaja në fushën e ilaçeve dhe në tregun e pajisjeve mjekësore,” tha Koveshi.
“Është e rëndësishme që të punojmë për të hetuar kompanitë duke bashkëpunuar me institucione të tjera të vendeve fqinje si dhe duke shkëmbyer informacione, ” shtoi ajo.
Rumania ende konsiderohet si një nga shtetet më të korruptuara në Bashkimin Europian dhe ka bërë përparim të kufizuar në luftën kundër korrupsionit dhe krimit të organizuar që kur u anëtarësua në BE në vitin 2007.
Por në vitet e fundit, numri i zyrtarëve të lartë të dënuar për marrje ryshfeti është rritur ndjeshëm.