Një gazetë kroate publikoi dokumente që tregonin se zëvendës kryeministri Tomislav Karamarko punoi për një lobist hungarez të kompanisë së energjisë MOL, duke ngritur pikëpyetje për konflikt interesi.
Nacional njoftoi të martën se zëvendës kryeministri kroat Tomislav Karamarko ka pasur lidhje biznesi me Josip Petroviç, një lobist për kompaninë e energjisë hungareze MOL, në të njëjtën kohë kur po punonte për Agjencinë e Kundërzbulimit të Kroacisë.
Sipas dokumenteve të publikuara nga Nacional, një kompani e themeluar nga Karamarko e quajtur Soboli u punësua në vitin 2004 nga Petroviç, gjatë kohës së tij si anëtar i bordit ekzekutiv të kompanisë kroate të energjisë INA, për të bërë vlerësime të fshehta biznesi për të.
Në atë kohë, Karamarko ishte kryetari i bordit Soboli, si dhe kreu i Agjencisë së Kundërzbulimit, POA të Kroacisë, dhe ishte i angazhuar personalisht për të bërë raporte për Perkoviç për zhvillimet në sektorin e energjisë në Kosovë, Bosnjë-Hercegovinë dhe Serbi.
Dokumentet e publikuara nga Nacional tregojnë se raportet e Karamarkos iu paraqitën Petroviçit nga INA në mars të vitit 2005.
Lidhjet personale midis Petroviç dhe Karamarko u zbuluan për herë të parë në muajin prill, kur Petroviç dëshmoi në një gjyq ndërkombëtar arbitrazhi në Londër midis Kroacisë dhe MOL mbi të drejtat e menaxhimit të INA, ku MOL mban rreth 49 për qind të aksioneve.
Karamarko pranoi miqësinë e tij me Petroviç.
Një skandal shpërtheu më herët këtë muaj, kur Nacional zbuloi se gruaja e Karamarkos, Ana Sariç Karamarko, ka marrë mbi 60.000 euro nga kompania e Petroviçit për shërbimet e pretenduara këshilluese në sektorin e energjisë.
Dokumente të tjera më pas treguan se menaxherët e MOL, disa prej të cilëve kishin edhe poste në bordin ekzekutiv të INA-s, miratuan punësimin e kompanisë së Karamarkos.
Partia Social Demokratike, SDP, e qendrës së majtë, të mërkurën e kaluar ka paraqitur një kërkesë për shkarkimin e Karamarkos dhe kërkoi që një komision i posaçëm parlamentar të hetojë këtë çështje.
Komisioni parlamentar i Konfliktit të Interesave tha të mërkurën se do të hetojë çësshtjen.
Karamarko kishte mohuar çdo konflikt interesi dhe tha të mërkurën e kaluar se çështja ishte “një skandal i krijuar nga hiçi”.
Ai tha se kjo ishte vetëm një përpjekje e presidentit të SDP, Zoran Milanoviç për ta hequr atë nga detyra.
Por Karamarko, i cili është edhe kryetar i partisë kryesore të koalicionit, Bashkimi Demokratik Kroat, HDZ, me gjasa do të duhet të përballet me një votim në parlament, pa mbështetjen e plotë nga partneri më i fortë në qeveri, MOST.
Gazeta Vecernji njoftoi të martën se dy nga 15 deputetët e MOST do të votojnë për shkarkimin Karamarkos.
Presidenti i MOST, zëvendës kryeministri Bozo Petrov i bëri thirrje HDZ të hënën “të deklarojë pozicionin e saj” në konfliktin e supozuar të interesit të Karamarkos.
“E para që duhet të deklarojë qëndrimin e saj duhet të jetë HDZ-ja, e ndjekur nga Komisioni për Konfliktin e Interesave. Unë i bëj thirrje HDZ të thotë zyrtarisht, nëse ky është problem për ta?”, tha ai.
Sekretari i HDZ Milijan Brkiç u përgjigj se Komisioni për Konfliktin e Interesit duhet të lejohet të marrë më parë vendimin dhe më pas HDZ të sqarojë pozicionin e saj.