Presidenti maqedonas Gjorge Ivanov tërhoqi të hënën të 56 faljet polemike të politikanëve të lartë dhe bashkëpunëtorëve të tyre që po ndiqeshin penalisht për akuza korrupsioni, por i qëndroi mendimit se falja e tij do ta zgjidhte krizën nëse do të çohej përpara.
Lëvizja presidentit maqedonas për të revokuar të gjitha faljet të hënën erdhi pasi BE-ja dhe SHBA-ja tha se vendimi i tij i dhjetë ditëve më parë për të tërhequr faljet e 22 nga 56 të dyshuarve, kryesisht politikanë të lartë, nuk ishte i mjaftueshëm për të ringjallur përpjekjet për zgjidhjen e krizës politike të vendit dhe se nuk i dilte kundër dëmit të shkaktuar nga faljet e para.
“Gjatë këtyre dhjetë ditëve të fundit [që prej tërheqjes së pjesshme të faljeve], kemi qenë dëshmitarë të interpretime të ndryshme të këtij vendimi në skenën e polarizuar politike”, tha Ivanov në një deklaratë të shkurtër për shtyp, duke iu referuar akuzave të opozitës se po mbronte politikanët e partisë VMRO DPMNE në pushtet nga ndjekjet penale.
Ai këmbënguli gjithashtu se pavarësisht presionit për tërheqjen e faljeve, dhe pranimit të tij më pas, ai është ende i sigurt se ato do të kishin kontribuar “për pajtimin kombëtar dhe se ishin një mënyrë për të dalë nga kriza politike”.
Tërheqja e plotë e faljeve erdhi një ditë para vizitës së planifikuar të të dërguarit special të Gjermanisë për Maqedoninë, Johannes Haindl, i cili pritet të ringjallë bisedimet e krizës midis partive politike në vend, pas disa javësh bllokim.
Më 12 prill, presidenti Ivanov fali 56 politikanë të lartë dhe bashkëpunëtorët e tyre, duke bllokuar punën e Prokurorisë Speciale që po i hetonte ata për korrupsion të nivelit të lartë, si pjesë e marrëveshjes së ndërmjetësuar nga BE të arritur verën e kaluar.
Ai këmbënguli se kishte vepruar për të ndihmuar kapërcimin e ndarjeve të thella politike në Maqedoni.
Megjithatë lëvizja e presidentit e përkeqësoi situatën politike në vend pasi ngjalli protesta anti-qeveritare në qytete të ndryshme të Maqedonisë, por pati edhe protesta në mbështetje të partisë në pushtet VMRO DPMNE të ish-kryeministrit Nikola Gruevski.
