Garda Ceremoniale e Kosovës ngriti flamurin e SHBA krah statujës së Bill Clinton në nder të Ditës së Pavarësisë së SHBA, të cilën shumë kosovarë e festojnë sikur të ishte një festë kombëtare.
Anëtarët e Gardës Ceremoniale të Kosovës ngritën flamurin amerikan të hënën në Prishtinë, për të festuar Ditën e Pavarësisë së SHBA-ve, një ditë festive në Kosovën pro-amerikane.
Edhe pse Katër Korriku nuk është një festë kombëtare në Kosovë, përveç letrave të urimit të dërguara nga zyrtarët e Kosovës në Ambasadën Amerikane, festime vjetore mbahen në këtë ditë dhe anëtarët e Forcave të Sigurisë së Kosovës vishen me uniformë.
Agim Rexhepi, kryetar i shoqatës “Miqtë e Amerikës” , tha për BIRN se eventet në këtë ditë janë bërë tashmë traditë lokale.
“Qëllimi i kësaj ngjarje është të tregojë respekt të sinqertë ndaj Shteteve të Bashkuara të Amerikës dhe çdo gjëje që ata kanë bërë për popullin e Kosovës”, tha Rexhepi.
Todd Jacobus, Zëvendës Drejtor i Ekipit Këshillues të NATO-s në Kosovë, tha për BIRN se ishte i befasuar nga shkalla e festimit.
“Është e pabesueshme të shohësh se sa vlerësim ka Kosova për Shtetet e Bashkuara. Nuk e kisha idenë se do të festohej edhe në Kosovë, ndaj në emër të 300 milionë amerikanëve në atdhe, ju falënderoj shumë që përkujtuat ditën tonë të pavarësisë. Është vërtet një privilegj të jem këtu në Prishtinë dhe ta festoj Ditën e Pavarësisë me të gjithë ju”, tha Jacobus.
Jacobus, i cili i ka shërbyer për 33 vjet në ushtrinë amerikane, ka qenë më parë pjesë e Gardës Kombëtare të Ajoas, me të cilën Forcat e Sigurisë në Kosovë kryejnë programet e shkëmbimit ushtarak përveç formave të tjera civile të bashkëpunimit.
Disa komuna kudo në Kosovë po festojnë 4 Korrikun me evente që përfshijnë një kampionat basketbolli dhe një koncert në kalanë e Vushtrrisë, një qytet në veri të Kosovës.
Kosovarët ia atribuojnë pavarësinë e tyre ndërhyrjes ushtarake të udhëhequr nga SHBA-të kundër Serbisë, dhe vendasit shpesh bëjnë shaka duke thënë se Kosova do të donte të bëhej shteti i 53-të i Amerikës . Tre bulevarde në Prishtinë kanë marrë emrin e politikanëve amerikanë si Bill Clinton, George Bush dhe Robert Dole.
Një brez i tërë i fëmijëve nga Kosova rurale tashmë kanë emra si Bill dhe Hillary, ndërsa disa kanë marrë versionin e plotë Bill Clinton si emër.
Katër Korriku feston miratimin e Deklaratës Amerikane të Pavarësisë nga Perandoria Britanike më 4 korrik 1776.