Kryeministri i Bullgarisë, i cili gjendet në një vizitë në Teheran, tha se Irani i ka kërkuar Bullgarisë të bashkohet në një korridor të ri transporti që duhet të lidhë Gjirin Persik me Detin e Zi duke anashkaluar Turqinë.
Irani e ka ftuar Bullgarinë të bashkohet në një korridor të ri transporti mes Gjirit Persik dhe Detit të Zi. korridor që duhet të lidhë Iranin, Armeninë, Gjeorgjinë dhe Bullgarinë, deklaroi të hënën kryeministri i Bullgarisë Boyko Borissov.
Ai po drejton delegacionin e parë të qeverisë Bullgare në vizitë zyrtare që nga viti 1988.
Fokusi kryesor i vizitës është bashkëpunimi në fushën e energjisë, për shkak se Bullgaria po has vështirësi për të gjetur një blerës për pajisje bërthamore të prodhuara nga gjigandi rus Atomstroyexport për projektin e papërfunduar të termocentralit bërthamor të Belene.
“Ky korridor mund të përdoret jo vetëm për mallra por edhe për gaz natyror,” deklaroi Borissov para gazetarëve pasi takoi zëvendëspresidentin e Iranit Eshaq Jahangiri.
Sipas kryeministrit të Bullgarisë, Bullgaria është e gatshme të marrë pjesë në korridorin e ri të transportit duke përdorur portet e Varnës dhe Burgasit.
Ai shpjegoi se brenda dy javëve, ekspertët nga katër vendet – Irani, Armenia, Gjeorgjia dhe Bullgaria – do të takohen në Sofie për të diskutuar detaje të tjera të projektit.
Sipas qeverisë, iniciativa për krijimin e një korridori të ri transporti vjen nga Irani, i cili po kërkon rrugë alternative me ata që kalojnë nëpër Turqi.
Krahas Borissov në Teheran janë edhe ministrat e energjisë, financave, punëve të jashtme, bujqësisë, transportit, zëvendëskryeministri përgjegjës për financimet europiane, zëvendësministri i ekonomisë si dhe një delegacion kompanish private.
Pas një takimi me ministrin e naftës të Iranit, Bijan Zanganeh, ministri i energjisë së Bullgarisë, Temenuzhka Petkova, njoftoi se Bullgaria mund të fillojë të importojë gaz natyror nga Irani brenda tri apo katër vjetësh.
Irani ka shprehur interes për një ndërlidhës të ri gazi mes Greqisë dhe Bullgarisë, projekt që është nisur më herët këtë vit.
Teherani po mendon gjithashtu të marrë pjesë në projektin e përbashkët bullgaro-grek për një terminal të gazit natyror të lëngëzuar (LNG) në qytezën greke të Aleksantropullit.
Pala bullgare po diskuton edhe me Organizatën e Energjisë Atomike të Iranit me shpresë se do të shesë pajisjet ruse të Irani.
“Europa është në dijeni të bisedimeve që ne po zhvillojmë. Nëse programi bërthamor i Iranit ka vetëm qëllime për përdorime civile, ne kemi një interes në bashkëpunime të tilla dhe Europa nuk ka problem për këtë gjë,” deklaroi ministri i jashtëm i Bullgarisë Daniel Mitov për agjencinë bullgare të lajmeve Focus.