Protestat në burgje janë përhapur në Rumani gjatë kësaj jave, ku të burgosurit po shprehin pakënaqësinë e tyre me kushtet e këqija, pavarësisht përpjekjeve për të pakësuar mbipopullimin gjatë dekadës së shkuar.
Rreth 500 të burgosur në 19 burgje rumune protestuan të enjten, ku disa refuzuan ushqimin, përplasën hekurat, goditën dritaret me shishe, i vunë flakën rrobave dhe thirrën “Poshtë qeveria!”, raportoi media.
Një i burgosur në një burg të Rumanisë qendrore tentoi vetëvrasjen të enjten, sipas raporteve.
Ministrja e Drejtësisë, Raluca Pruna, tha se autoritetet po ndjekin me kujdes zhvillimet në të gjitha burgjet e Rumanisë dhe se situata ishte nën kontroll.
“Ne do të fillojmë të kontrollojmë pretendimet e të burgosurve dhe ku të jetë e nevojshme do të përpiqemi të gjejmë një zgjidhje,” tha të enjten Pruna.
“Kushtet në burgje janë përmirësuar në vitet e fundit, por shumë probleme vazhdojnë të ekzistojnë ende,” shtoi ajo.
Protesta nisi në fillim të javës në një burg të sigurisë së lartë në Iasi, në lindje të vendit dhe u përhap më pas në pothuajse gjysmën e 44 burgjeve të Rumanisë.
Pruna tha megjithatë se shumë media i kanë ekzagjeruar protestat, duke ndezur situatën.
Disa politikanë kanë kërkuar dorëheqjen e ministres.
Me gjithë përpjekjet për modernizim, burgjet rumune ende nuk i përmbushin standardet europiane.
Mbipopullimi, kujdesi i pamjaftueshëm mjekësor dhe ushqimi i keq mbeten problemet kryesore, sipas aktivistëve.
Rumania ka rreth 30,000 të burgosur, por situata është përmirësuar krahasuar me dhjetë vjet më parë, kur kishte rreth 52,000 të burgosur në një sistem me kapacitet për vetëm 20.000.
Sipas të dhënave zyrtare, shteti shpenzon rreth 500 euro në muaj për çdo të burgosur, ku pjesa më e madhe e parave përdoret për të paguar pagat e atyre që punojnë në sistemin e burgjeve.
Numri i madh i të burgosurve është ende një barrë për shtetin.
Shumë burgjet ende kanë kushte higjienike të papërshtatshme, pamjaftueshmëri uji të ngrohtë, mangësi higjiene, ndriçimi dhe ajrosjeje, si dhe cilësi të dobët të ushqimit, sipas aktivistëve.
Shumë prej burgjeve janë të vështira për të rinovuar për shkak të mënyrës së ndërtimit.
Në prill, qeveria miratoi disa masa për përmirësimin e kushteve në burgjet rumune – masa të cilat kërkojnë 838.5 milionë euro investime gjatë shtatë viteve të ardhshme.
Administrata Kombëtare e Burgjeve planifikon të krijojë 10,895 vende të reja në burg dhe të modernizojë 1651 vende në burgjet vendase deri në 2023. Planifikohen gjithashtu të ndërtohen dy burgje të reja.
Në fillim të këtij viti, Gjykata Europian e të Drejtave të Njeriut, GJEDN, vendosi që Rumania të paguajë 100,000 euro kompensim për 18 të dënuar që kanë shlyer dënimet ose që janë aktualisht të burgosur, për shkak të kushteve të këqija të burgjeve vendase.