Ish-kryeministri britanik raportohet se ka mbajtur një takim privat në jug të Shqipërisë me Edi Ramën, për të cilin ai është një këshilltar mbi reformat.
Ish-kryeministri britanik, Tony Blair, po mban një vizitë private në Dhërmi në jug të Shqipërisë, ku të mërkurën media raportoi se ai u takua me kryeministrin Edi Rama në vilën qeveritare.
Vila është vetëm pak kilometra larg Himarës, ku Rama po kalon pushimet e verës.
Benedict Macon-Cooney, një këshilltar për median i Blair, i tha BIRN se Blair po mbante “një vizitë të shkurtër private”, të cilën këshilltari për komunikimin i Ramës, Endri Fuga e konfirmoi gjithashtu.
Blair dhe Rama nuk kanë dhënë deklarata rreth takimit.
Ish-lideri i Partisë Laburiste të Mbretërisë së Bashkuar thuhet se udhëtoi nga Trogir i Kroacisë drejt bregdetit shqiptar. Ai u pikas më 31 korrik, teksa qëndronte në hotelin e sapohapur Broën Beach House në Kroaci.
Blair ka lidhje të vjetra me Shqipërinë dhe ka qenë këshilltar i kryeministrit shqiptar prej ca kohësh. Që kur koalicioni i qendrës së majtë të Ramës fitoi zgjedhjet e përgjithshme në qershor 2013, ai lajmëroi se Blair do të këshillonte qeverinë e tij në reformat strukturore që duheshin ndërmarrë.
Rama e vizitoi Blair në Londër menjëherë pas zgjedhjeve. Në tetor 2013, Blair mori pjesë si këshilltar në takimin e parë informal të qeverisë dhe Rama lajmëroi se Blair, bashkë me Bankën Botërore, do të punonte për të formuar një njësi të veçantë të politikave për qeverinë shqiptare.
Pyetje janë ngritur se kush paguan për ekspertizën e Blair në Shqipëri dhe nëse ekziston kontrata formale mes tij dhe qeverisë shqiptare.
Megjithatë, Rama është shprehur vazhdimisht se Blair po punon vullnetarisht dhe se kjo nuk do t’i kushtojë vendit asgjë.
Më shumë pyetje pasuan në 2015, kur qeveria Rama nënshkroi një marrëveshje ligjore me firmën ligjore të gruas së Blair, Cherie, Omnia Strategy.
Firmës ligjore i kërkohej që të vepronte në emër të Shqipërisë në një mosmarrëveshje tregtare me një konsorcium të përbërë nga kompania amerikane Rapiscan Systems dhe firma vendase S2 Albania.
Pasi qeveria Rama u përpoq të rinegocionte një kontratë me dy kompanitë mbi marrëveshjen që kishin bërë me qeverinë e mëparshme për skanimin e kontenierëve në pikat kufitare shqiptare, kompania amerikane ngriti padi për shkelje të kontratës dhe kërkoi 350 milionë dollarë në gjykatën e arbitrazhit në Paris në shtator 2014.
Shqipëria fillimisht i pagoi firmës së Cherie Blair 495,000 për t’u marrë me çështjen por shuma u rrit në janar të 2015 me 150,000 euro të tjera, duke e çuar koston e këshillimit në 645,000 euro.
Mediat e kanë krahasuar punën e Cherie Blair në Tiranë me punën e firmës së saj në Kazakistan, ku bashkëshorti i saj punonte gjithashtu si këshilltar i sunduesit autokrat të vendit Nursultan Nazarbayev.