Policia kufitare e Bullgarisë ka gjetur kufomat e dy emigrantëve irakianë – një i ri dhe një djalë në moshë të vogël – të cilët u mbytën në përpjekje për të kaluar me barkë lumin Danub për të shkuar në Rumani.
Policia gjeti dy kufoma pranë fshatit Archar në veri-perëndim të Bullgarisë, ndërsa katër emigrantë të tjerë, përfshirë fëmijë rezultojnë të zhdukur, tha të hënën komisioneri Dimiter Chorbadjiev nga Drejtoria e Policisë Kufitare.
Chorbadjiev i tha televizionit kombëtar bullgar se aksidenti ndodhi të enjten e shkuar në mbrëmje kur dhjetë emigrantë u përpoqën të hynin në Rumani duke kaluar Danubin me barkë, të ndihmuar nga trafikantët.
Katër emigrantë, dy burra dhe dy gra, të cilët nuk kishin dokumente por pretenduan të ishin nga Iraku, u gjetën në ishullin Dobrota të Bullgarisë anë Danubit.
Ata thanë se një barkë që transportonte dy djem, dy vajza dhe dy të rinj u përmbys në lum.
Sipas Chorbadjiev një operacion kërkim-shpëtimi, të cilës iu bashkuan edhe patrullat kufitare të Rumanisë u mbajt të enjten në mbrëmje dhe gjatë të premtes, po u anulua atë mbrëmje.
Mbetet e paqartë megjithatë përse aksidenti nuk u bë publik të enjten kur gjashtë persona përfshirë fëmijë u zhdukën, por doli në media të dielën pasi u zbuluan dy kufoma.
Një zëdhënëse e policisë kufitare të Bullgarisë i tha BIRN të hënën se “mosraportimi i aksidenteve është politikë e qendrës së shtypit”
“Nuk e mbuluam apo fshehëm. Thjesht nuk na pyeti askush,” tha ajo.
Në shkurt, megjithatë kur trupat e dy refugjateve u gjetën të ngrira për vdekje në Bullgarinë jugperëndimore, rasti u bë publik.
I pyetur përse incidenti i fundit nuk u lajmërua publikisht, Chorbadjiev tha se nuk kishte prova për mbytjet përveç pretendimeve të emigrantëve dhe policia po e trajtonte si çështje të kalimit të paligjshëm të kufirit.
Pas gjetjes së trupave pa jetë të dielën, policia dhe prokuroria kanë nisur hetimet për vdekje nga neglizhenca ndaj të dyshuarve si trafikantë.
Zona po kërkohet ende nga polumbarët, por katër trupat e zhdukur nuk janë gjetur dhe as barka e mbytur nuk është identifikuar.
Të mbijetuarit thanë se po udhëtonin nga Iraku për në Gjermani. Ata i kishin paguar trafikantëve 10000 dollarë për të rriturit dhe 7000 për fëmijët.
Chorbadjiev tha gjithashtu se nuk kishte kamera sigurie në zonën ku ndodhi aksidenti dhe se policia ka shtuar patrullimet në kufi.
Ai tha se hera e fundit kur pati një përpjekje për të kaluar ilegalisht Danubin me barkë ishte tetë vite më parë.
