Eco Albania, një organizatë mjedisore e angazhuar kundër ndërtimit të digave në lumin Vjosë, shprehet se qeveria dhe investitori nuk kanë mbajtur konsultime publike në fshatrat që preken nga diga e hidrocentralit të Poçemit.
Në një njoftim për shtyp të shtunën, Eco Albania deklaroi që i vetmi konsultim publik mbi projektin energjetik mbi lumin Vjosë – i cili prek me përmbytje fshatrat Kutë, Çorrush, Anëbreg, Shkozë, Sevaster – është mbajtur në qytetin e Fierit me 28 shkurt 2015.
“Kjo përbën shkelje të ligjit për konsultimin publik, ku sipas tij dëgjesat publike për projektet e HEC-eve duhet të mbahen me komunitetin e prekur direkt nga ndërtimi i digës dhe sa më pranë zonës së prekur,” tha Olsi Nika, Drejtor Ekzekutiv i EcoAlbania.
Sipas Eco Albania kompania apo institucionet përgjegjëse nuk i kanë informuar paraprakisht ata për projektin dhe si rrjedhojë nuk janë bërë pjesë e procesit të vendim-marrjes, prandaj organizata mjedisore është duke ndërmarrë një fushatë takimesh informuese dhe ndërgjegjësuese me komunitetin e prekur nga ndërtimi i HEC-it të Poçemit.
I pranishëm në këto takime ka qenë Kryetari i Bashkisë Mallakastër, Agron Kapllanaj, i cili shprehu mbështetjen tij kundrejt kërkesave të komunitetit.
“Unë jam këtu për të mbrojtur interesat tuaja dhe për t’ju thënë që nuk jeni vetëm. Ne do të bëjmë gjithë përpjekjet tona institucionale që zëri juaj të dëgjohet tek vendimmarrësit” tha ai.
Qeveria njoftoi në fillim të majit përzgjedhjen e bashkimit të dy kompanive turke “Ayen Enerji Anonim Şirketi” dhe “Çinar-San Hafriyat Nakliyat Inşaat Turizm San Ve Tic Ltd.Şti”, për ndërtimin e hidrocentralit të Poçemit, një nga koncesionet më të mëdha të dhëna në sektorin e energjisë elektrike përgjatë viteve të fundit.
Ndërtimi i digave në lumin Vjosë kundërshtohet nga grupet mjedisore dhe ato akademike, të cilët e konsiderojnë atë një lum unik për gjithë Europën.