Organizata për Median në Europën Juglindore bëri thirrje për respektimin e lirisë së medias dhe lirisë së shprehjes në Shqipëri pas shqetësimit të krijuar nga bllokimi i transmetimit të dokumentarit “Kodrina e Vdekjes” në Vizion Plus.
Organizata për Median në Europën Juglindore (SEEMO sipas akronimit në anglisht) reagoi me shqetësim mbi mostransmetimin e emisionit investigativ Publicus në Vizion Plus.
SEEMO u habit kur mësoi anulimin e emisionit invesitgativ në Shqipëri pas vetëm tri episodesh të transmetuara,” thuhet në një deklaratë për shtyp të kësaj organizate.
“Anulimi i papritur i një emisioni investigativ është shqetësues,” deklaroi Sekretari i Përgjithshëm i SEEMO Oliver Vujovic. “Redaktorët natyrisht kanë të drejtë të vendosin mbi ndryshimet mbi program, por publiku duhet të informohet mbi arsyet që sollën mbylljen e Publicus,” shtoi Vujovic. SEEMO shprehu gjithashtu shqetësim për lajmet mbi pushimin nga puna të ish-kryeredaktores të televizionit A1 News Alida Tota, pasi kjo e fundit u përpoq të transmetonte një lajm mbi tragjedinë e Sharrës, ku një 17 vjeçar, Ardit Gjoklaj, humbi jetën duke punuar në turnin e tretë në një kompani private që kishte marrë leje nga Bashkia e Tiranës për të ricikluar mbetje në kushte të debatueshme ligjore.
Emisioni Publicus u transmetua në YouTube dy ditë pas anulimit të transmetimit të tij në Vizion Plus.
Autori i emisionit, regjisori Artan Rama, i tha BIRN se nuk e dinte se cili qe personi që bëri presion mbi Vizion Plus për të bllokuar emisionin, por dukshëm, kryebashkiaku Erion Veliaj dhe marrëveshja e tij me kompaninë 3 R, e cila solli vdekjen tragjike të Ardit Gjoklajt, qe tema kryesore e emisionit.
Partia Demokratike në opozitë akuzoi kryebashkiakun Erion Veliaj si përgjegjës për bllokimin e transmetimit. Një grup gazetarësh dolën në protestë të premten e kaluar para zyrës së kryebashkiakut.
Administratori i Vizion Plus Genc Dulaku i tha BIRN se emisioni nuk u publikua për shkak se autorët qenë me vonesë në montim ndërsa mohoi që përmbajtja e emisionit që qe shkak.
Kryebashkiaku Veliaj mohoi disa ditë më vonë akuzat duke deklaruar se nuk i ka bërë presion Vizion Plus. “Nuk e kam kontaktuar kurrë Vizion Plus,” tha Veliaj. “Sfidoj këdo që bën gazetari të mirëfilltë të provojë të kundërtën,” shtoi ai.
Gjithsesi, për SEEMO, fakti është që emisioni është ndaluar të transmetohej dhe se kjo përbën në vetvete një problem të rëndë.
SEEMO është një rrejt redaktorësh, drejtuesish mediash dhe gazetarësh në Europën Jugore, Lindore dhe Qendrore dhe punon për lirinë e medias në bashkëpunim me Qendrën Europiane për Media dhe Lirinë e Medias (ECPMF).
