Ndërsa ekspertët mjekoligjorë në Kosovë filluan të hënën procesin e autopsisë së Astrit Deharit, aktivistit të Vetëvendosjes që vdiq të shtunën në burg – OJQ-të, avokatët, politikanët dhe të afërmit e tij po kërkojnë përgjigje.
Avokatë, OJQ dhe politikanë vazhduan të ushtrojnë presion te autoritetet e Kosovës që të shpjegojnë rrethanat e vdekjes në burgun e Prizrenit të aktivistit të ri të Vetëvendosjes, Astrit Dehari.
Vdekja e Deharit të shtunën në një burg në Prizren ka shkaktuar trazira në vend, duke ngritur shumë pyetje shqetësuese nga analistët, studentët, përfaqësuesit e opozitës dhe miqtë.
Eksperti i çështjeve ligjore Kujtim Kerveshi në Facebook përsëriti kërkesat e opozitës që vdekja e Deharit të investigohet nga ekspertë të huaj.
“Shoqëria e Kosovë nuk i beson dhe nuk duhet t’i besojë më tej hetimet e çështjeve të tilla institucioneve tona; ato nuk janë të përgjegjshme ose profesionale dhe nuk janë të pavarura nga ndikimi,” shkroi Kerveshi duke fajësuar shtetin.
Avokati Korab Sejdiu tha se shumë faktorë e kishin fajin për vdekjen e parakohshme të Deharit.
“Prokurorët janë gjithashtu fajtorë. Së fundmi ata kanë krijuar një zakon të kërkesës automatike të paraburgimit [për të dyshuarit] pavarësisht nëse ata mendojnë se mund ta vërtetojnë krimin me prova,” tha Sejdiu.
Dastid Pallaska, një avokat dhe analist politik, ngriti 15 pyetje në Facebook që sipas tij duhet të marrin përgjigje.
Megjithatë, ai gjithashtu paralajmëroi që të mos bëheshin gjykime të nxituara. “Duhet t’i rezistojmë impulsit për të arritur në përfundime të nxituara për shkaqet dhe rrethanat e kësaj tragjedie,” tha ai.
Kryetari i parlamentit të Kosovës, Kadri Veseli gjithashtu bëri thirrje për sqarim të rrethanave të vdekjes së Deharit.
Një OJQ, Demokracia Studentore, e krahasoi atë me shumë vdekje të pashpjeguara të kosovarëve të paraburgosu përpara luftës së vitit 1999 në Kosovë, kur autoritetet serbe e qeverisnin provincën me dorë të hekurt.
“Rasti i djeshëm na kujton për vdekjet dhe vrasjet e pashpjeguara që u kryen nga kriminelët serbë në burgjet në Kosovë,” tha OJQ-ja.
Zyra e prokurorisë së Kosovës tha se po e hetonte tashmë vdekjen e tij, që kreu i zyrës së prokurorit në Prizren e përshkroi si “të dyshimtë”.
Familja Dehari ka kërkuar një ekspert të pavarur mjekoligjor në procedurën e autopsisë.
Ndërkohë, të dielën në qendër të Prishtinës u mbajtën homazhe në nder të Deharit, ndërsa të hënën do të ndodhë e njëjta gjë në kryeqytetin e Shqipërisë, Tiranë.
Dehari u paraburgos në gusht, pasi u arrestua si i dyshuar për terrorizëm me dyshimin se hodhi një mjet shpërthyes në parlament në gusht.
Familja Dehari ka humbur brenda dy viteve dy djem. Arbër Dehari, sekretari organizacional i Vetëvendosjes vdiq në vitin 2014 nën atë që u dyshua të ishte vetëvrasje.