Bashkia e Tiranës ka shembur të premten pesë shtëpi të komunitetit rom në zonën e Bregut të Lumit, me argumentin se duke i rrafshuar banesat, i shpëton banorët nga përmbytjet, – një pretendim që banorët e mbetur të pastrehë e kundërshtojnë.
Nën një qiell të zymtë dhe të lagur nga një shi i imët, të premten pasdite, Alban dhe Shkëlqim Sollaku po përdornin një frezë elektrike dhe një vare, për të shkulur atë pak hekur që kishte mbetur akoma i varur mbi kolonat e shtëpive të tyre tek Bregu i Lumit.
Më herët gjatë ditës, një fadromë e bashkisë Tiranë i kishte bërë vizitë komunitetit rom të cilit ato i përkasin, duke rrafshuar pesë ndërtesa – mes tyre dhe dy shtëpitë e vëllezërve Sollaku.
“Erdhën dje në orën 2 dhe më thanë nxirr plaçkat, dhe më lajmëruan se ke kohë deri në 8 të mëngjesi,” tregon Alban Sollaku. “Sot jam nën dritën e zotit në shi,” shtoi ai duke u ankuar për vendimin e bashkisë Tiranë për shembjen e banesës së tij.
Për gati dy dekada, rreth 80 familje të varfra nga anë të ndryshme të Shqipërisë –shumica nga komuniteti rom dhe egjiptian – e kanë ndërtuar jetën e tyre në këtë zonë, që shtrihet në brigjet e Lumit të Tiranës, në skajin perëndimor të kryeqytetit.
Pjesa më e madhe e këtyre familjeve së shpejti duhet të shpërngulen, pasi shtëpitë e tyre preken nga projekti i bashkisë Tiranë për rehabilitim e shtratit të lumit të Tiranës.
Ndërtesat e vëllezërve Sollaku, ishin dy nga 5 banesat e shembura nga bashkia e Tiranës në këtë zonë informale gjatë 24 orëve të fundit, ndërkohë që kryeqyteti është prekur nga reshje të dendura që kanë sjellë përmbytje në zona të ndryshme.
E pyetur nga BIRN, bashkia në një komunikim me shkrim i përshkroi shembjet me fadroma si një zhvendosje emergjente e banorëve të zonës, që sipas saj rrezikohen nga përmbytjet; ndërkohë që shtoi se familjet që preken nga projekti i rehabilitimit të lumit do të përfitojnë nga programet e saj sociale.
“Nisur nga reshjet e dendura të shiut të ditëve të fundit, çka solli edhe përmbytjen e banorëve në fjalë, Bashkia e Tiranës u detyrua te ndërhyjë me evakuimin e disa familjeve aty, jeta e të cilave është vazhdimisht e rrezikuar për shkak të prurjeve të mëdha te Lumit të Tiranes,” tha zëdhënësi i bashkisë Tiranë, Renato Kalemi.
“Të gjitha familjet që do të shpërngulen nga shtrati i Lumit të Tiranës do të trajtohen specifikisht nga Bashkia e Tiranës, sipas kërkesave të tyre. Bashkia e Tiranes u ka ofruar atyre disa zgjidhje, si: Bonus qiraje, strehim ne qendrën e emergjencave, banesa sociale ose nga janari i 2017, te jenë përfitues të sistemit për kredi të buta,” shtoi Kalemi.
Sipas bashkisë aktualisht, nga 10 familje që kanë aplikuar për bonus qiraje, 8 prej tyre janë përfitues të subvencionimit 100% të vlerës së qirasë.
Por disa nga kryefamiljarët rom me të cilët komunikoj BIRN, përfshirë edhe Shkëlqim Sollaku, që po shpëtonte çfarë të mundte nga rrënojat e shtëpisë së tij të shkatërruar, u shprehen se nuk e kanë marrë akoma bonusin e premtuar të strehimit.
“Bonusin për 1 vit qira nuk e kam marrë akoma. Nuk kanë hedhur asgjë në bankë,” Shkëlqimi i tha BIRN, teksa qëndronte mbi rrënojat e banesës së tij.
Ai nuk është i vetmi. Tefta Mejdani, nënë e dy fëmijëve që punon në një rrobaqepësi, i tha BIRN se qe duke pritur për bonusin që të hidhej në bankë, kishte humbur dhe apartamentin me qira që kishte gjetur më herët.
“Atë shtëpinë që kisha gjetur ajo e zuri, sepse më tha se unë nuk do të pres ty,” shpjegoi Tefta “Tani kam gjetur një shtëpi tjetër, dhe duhet të bëj një kontratë tjetër,” shtoi ajo.
Ndryshe nga i vëllai, Alban Sollaku nuk përfiton nga bonusi i strehimit dhe as që është i gatshëm të largohet nga Bregu i Lumit.
Edhe pse ka vite që jeton në Tiranë, ai është akoma i regjistruar si banor në Elbasan dhe nuk mund të jetë pjesë e skemës e ndihmës sociale të bashkisë Tiranë.
“Nuk përfiton bonus se ke pasaportizimin në Elbasan. Kam një ndërtesë këtu dhe çfarë do të thotë ajo,” tha Albani, duke treguar nga rrënojat por pa shpjeguar pse nuk e kishte ndërruar pasaportizimin. “Më le ti si shtet që të ndërtoj këtu. Ku ishe deri dje? Do të bëj një kasolle me plastmasë dhe to të jetoj përsëri këtu,” shtoi ai.
