Inspektorati Shtetëror Teknik dhe Industrial shpalli përgjegjës mungesën e sigurisë në punë për aksidentin e natës së 10 nëntorit në Ballsh ndërsa kompania thotë se pati një “gabim njerëzor”. Prokuroria dhe policia nuk kanë ende të ndaluar si përgjegjës për vdekjen e punëtorit Shkëlqim Muça.
Një aksident shkaktoi vdekjen e një punëtori dhe plagosjen e disa të tjerëve në Kombinatin e Përpunimit të Thellë të Naftës në Ballsh mbrëmjen e 10 nëntorit, aksident që sipas Inspektorati Shtetëror Teknik dhe Industrial është shkaktuar nga përdorimi i një pajisjeje që qe certifikuar si funksionale kur në fakt nuk qe e tillë. Shpërthimi që ndodhi rreth orës 22.42 të natës, solli vdekjen e naftëtarit 40 vjeçar Shkëlqim Muça, babai i pesë fëmijëve si dhe plagosjen e disa naftëtarëve të tjerë.
Inspektoriati, raporti i inspektimit të të cilit u publikua sot nga Ministria e Energjisë, nënvijëzon se valvula që shkaktoi tragjedinë qe certifikuar si “në gjendje pune” nga ana e një kompanie që qe punësuar nga rafineria për inspektim, por në fakt ajo qe jashtë funksionimi.
“Shkaku i shpërthimit dhe i shfaqjes të kësaj vatre të madhe zjarri ishte mos funksionimi i valvolës të sigurimit të pajisjes dhe mosrespektimi i rregulloreve të shfrytëzimit duke përdorur linjat direkte”, shkruhet në raportin e Inspektoriatit.
Ndërkohë, kompania IRTC sh.a, e cila ka marrë në shfrytëzim rafinerinë me kushte kontraktuale të paqarta, deklaroi se “aksidenti është shkaktuar nga ndërprerja e paparalajmëruar energjisë”, “mosfunksionimi i linjës rezerve te energjisë si dhe për shkak të një gabimi njerëzor gjate rivënies ne punë të repartit të hidro-pastrimit”.
Inspektoriati nuk përmend probleme me furnizimin me energji si shkak të aksidentit por thotë se ka identifikuar dokumentin e certifikimit të pajisjes nga një kompani e tretë e quajtur “ALBA ENERG”sh.p.k, e cila një vit më parë “ka siguruar se pajisja garanton sigurinë e punës”.
Aktualisht Inspektoriati thotë se tashmë i takon prokurorisë për të vijuar hetimet.
Rafineria e Ballshit është më e madhja në Shqipëri me kapacitet teorik përpunimi prej 1 milionë tonësh nafte në vit. Ajo qëndroi e mbyllur për më shumë se një vit dhe naftëtarët mbetën pa paga, pasi pronari i mëparshëm falimentoi. Qeveria aktuale ka deklaruar se “është investuar” për të siguruar rivënien në punë të rafinerisë, e cila ka rënë pre e skemave të stërmëdha të mashtrimeve. Vetëm pak ditë më parë, kryeministri Edi Rama e pati vizituar rafinerinë duke e deklaruar atë “të rilindur”.
Link: Deklarata e Inspektoriatit
Link: Deklarata e kompanisë