Emigrantët vazhdojnë të mbërrijnë në Serbi por mbijetesa po bëhet gjithnjë e më e vështirë teksa kufiri me Hungarinë është pothuajse i pamundur për t’u kaluar pa paguar mirë trafikantët.
Më shumë se 1500 emigrantë nga Pakistani dhe Afganistani, shumë prej të cilëve fëmijë dhe adoleshentë po luftojnë me motin e akullt të dimrit në Serbi në një kazermë të braktisur ushtarake me shpresën se udhëtimi i tyre do të vazhdojë.
Shumë prej tyre kanë qëndruar aty për javë, në mos muaj. Nuk ka ujë të pijshëm dhe elektricitet, ata e mbajnë veten ngrohtë duke improvizuar zjarr brenda barakave, që prodhon shumë tym.
Shapur nga Afganistani ka kaluar dy muaj në këto kushte. Ai dhe miku i tij Kamrad po bëhen gati të udhëtojnë në Francë.
Megjithëse ministria e çështjeve sociale i ka kërkuar OJQ-ve të mos shpërndajnë ndihma, njerëz të caktuar dhe një organizatë humanitare shpërndan vakte çdo ditë në këtë zonë.
“Ne shpërndajmë një mijë vakte në ditë këtu dhe gjithnjë na mbaron ushqimi,” tha Paul Linger, një vullnetar për Hot Food Idomeni. “Kjo është gjithnjë një përgjigje emergjence,” vazhdoi ai.
Ai thotë se do të vazhdojë të ushqejë njerëzit për sa kohë të kenë nevojë, “por sa kohë do të marrë kjo?”, – pyeta nuk merr një përgjigje.
Ndërsa BE-ja mezi po gjen një zgjidhje për krizën e migrantëve në përgjithësi, zgjidhja e problemit që kanë mbetur në Serbi duket gjithashtu e pazgjidhshme.
Emigrantët kryesisht nga Afganistani dhe Pakistani po përdorin barrakat e vjetra pranë stacionit hekurudhor prej muajsh.
Askush nuk e di se sa është numri i saktë, por Ivan Gerginov, nga Komisariati i Serbisë për Refugjatët, një organ shtetëror, thotë se rreth 1500 persona ndodhen aktualisht në barraka të braktisura.
“Kemi një problem sepse gjithnjë e më shumë njerëz po vijnë, por thuajse asnjë prej tyre nuk largohet nga Serbia. Kemi 6000 vende në qendrat tona, rreth 1000 janë ende të lira, por njerëzit nuk duan të shkojnë në kampe të largëta,” tha Gerginov për BIRN.
“Po përpiqemi të gjejmë më shumë hapësirë, familjet po ndajnë shtretërit për shembull, vetëm për të krijuar më shumë vend që të mos lihet askush jashtë. Por e shoh të vështirë të bind njerëzit që qëndrojnë në barraka të largohen prej tyre,” shtoi ai.
Ndërkohë, Shapur dhe disa emigrantë të tjerë shpresojnë të arrijnë Francën së shpejti. Vetëm 15 vjeç, ai ka kaluar dy muaj në Serbi dhe është përpjekur të kalojë kufirin me Hungarinë tre herë. Çdo herë është kapur nga policia.
Shoku i tij Abaidullah ka pasur një fat të ngjashëm. Gjatë dy muajve që ai ka qëndruar në barrakat në Beograd, ia ka dalë të shkojë dy herë në kufi, por asnjë nga përpjekjet nuk ka qenë e suksesshme. Policia hungareze e ka kthyer në Serbi.
Sipas tij, kalimi i kufirit tani kushton 1500 euro. “Trafikantët janë miqtë tanë më të mirë. Ata ndihmojnë,” tha Abaidullah.