Nëpërmjet një deklarate për shtyp të dielën, Komisioni Qendror i Zgjedhjeve deklaroi se 7 deputetë – përfshirë ish kryeministrin Sali Berisha- dhe 5 kryebashkiakë, kanë plotësuar me të dhëna shtesë formularin e dekriminalizimit pas përfundimit të afatit zyrtar.
“Komisioni Qendror i Zgjedhjeve informon se 12 funksionarë publikë, 7 deputetë: Arben Ristani, Artan Gaçi, Spartak Braho, Sali Berisha, Vladimir Kosta, Xhemal Qefalia, Ylli Shehu dhe 5 kryetarë bashkie: Artur Bardhi, Adriatik Zotkaj, Edmond Themelko, Ndrec Dedaj, Tërmet Peçi, kanë depozituar në KQZ kërkesë për plotësim të të dhënave në formularët e vetëdeklarimit, ndonëse pas përfundimit të afatit të parashikuar nga neni 15, pika 2, e ligjit,” tha zëdhënësja e KQZ-së Drilona Hoxha.
“Kërkesat e tyre për plotësimin e të dhënave kanë qenë ose për ndryshim gjenealitetesh, ose për të dhëna mbi dënime me gjobë për shpifje, armëmbajtje pa leje, fyerje etj. Vetëm 1 kërkesë për plotësim, është bërë për dënim me burg (45 ditë), për kalim të paligjshëm kufiri në vitin 1990,” shtoi ajo.
Sipas KQZ-së këto kërkesa janë depozituar dhe pranuar nga Komisioni përgjatë periudhës Qershor-Korrik 2016. KQZ shprehet se pranimi i kërkesave për plotësim të të dhënave në formularët e vetdeklarimit është bazuar në kodin e procedurës administrative. KQZ shtoi se plotësimi i të dhënave pas afatit ligjor të vendosur nga ligji i shërben transparencës.
“Vlerësojmë se, vetëm verifikimi i plotë dhe transparenca për çdo të dhënë në lidhje me dënimet penale, garanton besimin e publikut në organet e zgjedhura,” tha KQZ.
Komisioni nënvizoi se qëllimi i ligjit të dekriminalizimit është të garantojë besimin e publikut në funksionim e organeve të zgjedhura , institucioneve të pavarura dhe atyre të krijuara me ligj dhe të administratës publike dhe jo inkriminimi i pakuptimtë dhe cënimi i padrejtë i dinjitetit të individëve që janë subjekte të vetëdeklarimit.
“Çdo interpretim tjetër i dispozitave të ligjit për dekriminalizimin është i gabuar dhe në kundërshtim me Kushtetutën, pasi automatikisht sjell dhunimin e një sërë të drejtash kushtetuese,” tha KQZ.
Sipas KQZ-së 19 prej 140 deputetëve në Kuvend kanë të dhëna në një ose disa nga rubrikat në formularin e vetëdeklarimit, apo kanë shënime në vërtetimet e gjendjes gjyqësore. Ndërkohë nga 61 kryebashkiakë, 11 kanë deklaruar të dhëna në disa rubrika të formularit të vetdeklarimit.
Nga shqyrtimi i formularë vetëdeklarimi, vërtetimeve të gjendjes gjyqësore, si dhge dokumentacionit të dorëzuar nga vetë subjektet, ka rezultuar se disa deputetë dhe kryebashkiakë kanë shënime në formularët e vetëdeklarimit, por nuk janë në kushtet e ndalimit të ushtrimit të funksionit.
Funksionarët publik në fjalë janë: Alban Zeneli, Andrea Marto, Arben Ristani, Armando Prenga, Adem Lala, Agron Kapllanaj, Artur Bardhi, Adriatik Zotkaj,Edi Paloka, Edmond Themelko, Fatmir Mehdiu, Parid Cara, Spartak Braho, Shkëlqim Selami, Tom Doshi, Tërmet Peçi, Vladimir Kosta dhe Ylli Shehu.
Gjithashtu, nga verifikimi i dokumentacionit ka rezultuar se 4 deputetë dhe 4 kryebashkiakë nuk kanë shënuar asgjë në rubrikat e formularit të vetëdeklarimit por, sipas vërtetimit të gjendjes gjyqësore rezulton se kanë dënime me vendim të formës së prerë, fllim të procedimit penal apo shqyrtime nga gjykatat shqiptare, për vepra penale të cilat nuk përfshihen në kushtet për ndalimin e ushtrimit të funksionit.
Në këtë listë përfshihen deputetët Armando Prenga, Asllan Dogjani, Andrea Marto, Florion Mima dhe kryebashkiakët Artur Bardhi, Adem Lala, Ndrec Dedaj dhe Zef Hila.
Sipas KQZ-së ligji i ‘dekriminalizimit’ sanksionon një listë të mbyllur ‘krimesh’ për të cilët zyrtarët publik janë të detyruar të deklarojnë.
“Në zbatim të nenit 11 dhe 2 të ligjit 138/2015, për funksionarët e sipërcituar, të dhënat e pa deklaruara nuk përbëjnë shkak për ndalim të ushtrimit të funksionit apo për kallzim penal,” përfundoi KQZ.
