Ministria e Energjisë dhe Industrisë publikoi të hënën një projektvendim qeverie që urdhëron ngritjen e një grupi pune për vlerësimin e dëmeve dhe kompensimin e shtëpive të shembura apo të dëmtuara rëndë me një çmim prej 53 mijë lekësh për metër katror ndërsa Bankers thotë se ndërprerja e injektimit të ujit i kushton mesatarisht 50 mijë dollarë në ditë.
Projektvendimi i shpërndarë nga Ministria e Energjisë për mediat me email, pritet të miratohet në një mbledhje qeverie të mërkurën dhe përcakton se brenda pesë ditësh do të ngrihet një grup pune për vlerësimin e dëmeve ndërsa raporti final i dëmeve duhet të përfundojë brenda 30 ditëve.
Projektvendimi i qeverisë vjen pas javësh të tëra protestash të banorëve të fshatit Zharrëz pranë Fierit, të cilët kërkojnë dëmshpërblim për shtëpitë që i janë shembur nga tërmetet e vazhdueshme që kanë prekur këtë zonë.
Sipas projektvendimit, banorët e Zharrëzës do të kompensohen në masën 100 për qind për dëmet e pësuara, ku për çmim referencë për dëmet do të merret kostoja zyrtare e ndërtimit, sipas një udhëzimi të qeverisë të vitit 2015. Sipas këtij udhëzimi, kostoja me të cilin banorët do të dëmshpërblehen për shtëpitë e shembura ose të dëmtuara është 53 mijë lekë për metër katror.
Banorët e Zharrëzës kanë protestuar prej vitesh për shkak të tërmeteve, të cilat dyshohet se shkaktohen nga aktiviteti i kompanisë së nxjerrjes së naftës Bankers Petroleum. Kompania thotë se tërmetet janë për shkaqe natyrore dhe se aktiviteti i saj nuk është shkaktar i lëkundjeve të tokës.
Një grup ekspertësh do të duhet të vlerësojë shkaqet e tërmeteve.
Çmimet referencë të përdorura janë ato që qeveria ka përcaktuar për rastet e ndihmës për familjet e pastreha.
Qeveria shqiptare përdor standarde të ndryshme për dëmshpërblim. Në rastin e shpronësimeve për interes publik, çmimet referencë të përdorura janë të tjera, duke shkaktuar protesta të shumta, si në rastin e shembjeve te Bulevardi i Ri i Tiranës, ose te Unaza e Re, ku shtëpitë u kompensuan me më pak se 20 mijë lekë për metër katror, ose ose gjashtë herë më lirë se tregu.
Krahas vendimit për të kompensuar banorët për dëmet e pësuara, qeveria ka urdhëruar kompaninë Bankers Petroleum të ndërpresë injektimin e ujit teknologjik, vendim për të cilin kompania thotë se e konsideron të padrejtë. Pyetur nga BIRN, Bankers tha se do ta respektojë vendimin e qeverisë, por paralajmëroi se mungesa e injektimit shkakton “rënie të prodhimit me 1,500 fuçi në ditë, e barazvlefshme kjo me 50 mijë dollarë në ditë”. Bankers nxjerr aktualisht 15 mijë fuçi naftë në ditë.