Një gjykatë franceze vendosi për herë të dytë ta shtyjë vendimin në lidhje me ekstradimin apo jo në Serbi të ish-kryeministrit të Kosovës Ramush Haradinaj për të dalë në gjyq nën akuzat për krime lufte.
Gjykata e Apelit në qytetin francez Colmar të martën vendosi ta shtyjë për më 6 prill seancën për ekstradimin e Ramush Haradinaj.
Kjo ishte hera e dytë që gjykata e vonon vendimin e saj në lidhje me dërgimin apo jo në Serbi të Haradinaj ku ai të dalë në gjyq nën akuzat për krime lufte.
“Gjykata ka kërkuar informacione shtesë nga Serbia,” tha Ramush Haradinaj ndërsa largohej nga gjykata të enjten, raporton Klan Kosova.
I rrethuar nga mbështetës etnikë shqiptarë jashtë gjykatës, ish-komandanti guerilas i Ushtrisë Çlirimtare të Kosovës, i cili tani drejton një parti opozitare, tha se çështja e Serbisë ishte e motivuar politikisht.
“Jam një peng i politikave,” tha Haradinaj për mediat.
Haradinaj është liruar dy herë nga akuzat nga Gjykatën e Hagës për krime lufte të kryera gjatë konfliktit të viteve 1998-1999 në Kosovë.
Megjithatë, zyrtarët serbë këmbëngulin se ata kanë prova se Haradinaj ishte i përfshirë në krime të tjera lufte për të cilat ai s’është gjykuar ende.
Ata thonë se ai dyshohet për vrasje të civilëve, përfshirë vrasjen e një fëmije dy javësh, torturimin dhe përdhunimin e një të mituri.
Ata kanë kërcënuar gjithashtu se do të hakmerren nëse Parisi s’e dërgon atë në Beograd.
Arrestimi i tij në një aeroport francez pasi ai u nis nga Kosova muajin e kaluar rriti tensionet midis Beogradit dhe Prishtinës.
Ai shkaktoi gjithashtu protesta nga shqiptarët brenda dhe jashtë Kosovës, të cilët bëjnë thirrje për lirimin dhe e dënojnë arrestimin e tij si një akt politik.
Gjykata franceze e liroi Haradinajn me kusht më 12 janar, por e urdhëroi atë të qëndrojë në Francë nën mbikëqyrje gjyqësore ndërsa autoritetet shqyrtojnë nëse duhet ta dërgojnë apo jo atë në Serbi që të përballet me akuzat për krime lufte.
