Pasi u ankuan se gazeta e tyre satirike Pras Press është bllokuar nga shitja në stendat e gazetave, karikaturistët dhe gazetarët kanë vendosur t’i shesin kopjet direkt e në rrugë.
Karikaturistët dhe botuesit e një gazete të re, të publikuar nga “Shoqëria e Karikaturistëve të Ashpër” të Bullgarisë, të hënën thanë se planifikoni t’i shisnin kopjet e Pras Press direkt në sheshin Slaveikov në qendër të Sofjes, njohur si një qendër e shpërndarjes së librave.
Të tjerë vullnetarë do të dalin në rrugët e Sofjes dhe qyteteve të tjera të mërkurën për të shpërndarë botimin satirik, që u krahasua me revistën franceze Charlie Hebdo kur u botuan kopjet e para më 1 mars.
“Po përpiqemi të shmangim monopolin e shpërndarjes së shtypit në Bullgari,” tha për BIRN Tchavdar Nikolov, një karikaturist i njohur dhe një nga botuesit e Pras Press.
Ai dhe botuesit e tjerë – gazetari Ivan Bakalov dhe karikaturistët Christo Komarnitski, Alla dhe Chavdar Georgievi, thanë të dielën se shpërndarësi i tyre Kompania Shtetërore e Shpërndarjes, kishte penguar daljen në stendat e gazetave të botimit të tyre prej 10,000 kopjesh.
“Rreth nëntëdhjetë për qind e qarkullimit tonë është bllokuar diku, ka ngecur ose është ndaluar,” tha Bakalov, duke shtuar se vetëm një e dhjeta e kopjeve kishin arritur te lexuesit në vend.
Ai shpjegoi se shumë lexues i kishin telefonuar ata më 1 mars, duke u ankuar se nuk mund të gjenin gazetën në kioska.
“Kjo vazhdoi gjithë ditën; ne dolëm vetëm, pyetëm përreth dhe zbuluam se disa pika gazetash nuk kishin marrë asnjë kopje ose vetëm dy kopje,” tha Bakalov.
Gazetarët akuzuan biznesmenin dhe ish-deputetin Delyan Peevski se kishte kontrolluar shpërndarjen e gazetës, megjithëse ai nuk është mes pronarëve të Kompanisë Shtetërore të Shpërndarjes.
Megjithatë, ai dhe kolegët e tij i lidhin problemet e shpërndarjes së gazetës së tyre me talljen e ashpër të elitës politike, ndërsa vendi është në prag të zgjedhjeve.
Peevski po kandidon për deputet sërish më 26 mars me lëvizjen e dominuar nga turqit etnikë, për Të Drejta dhe Liri, MRF.
“Po i hapim luftë Peevskit, i cili kontrollon shitjet; kompanitë e shpërndarjes janë të tijat. Një luftë në çdo front. Ai do të jetë në kopertinën e botimit tjetër,” tha Bakalov në Facebook më 1 mars.
Chavdar Nikolov i tha BIRN se skuadra e gazetës nuk ishte mundur të kontaktonte më kompaninë e shpërndarjes që nga dita që Pras Press u botua, pasi telefonat e tyre ishin fikur.
Satiristët u zotuan ta çojnë çështjen te Komisioni për Mbrojtjen e Konkurrencës, prokuroria shtetërore, si dhe te qeveria dhe presidenti.
“E drejta jonë për të bërë biznes dhe për të shprehur veten lirshëm është shkelur,” tha Nikolov, duke iu referuar renditjes së ulët të Bullgarisë në vendin e 113, në Renditjen e Lirisë së Shtypit të Gazetarëve pa Kufij për 2016.
