Pasi një spital në Hungari u izolua të enjten dhe disa raste të fruthit u raportuan, doktorët po i druhen një epidemie që mund të përhapet në Europë.
Autoritetet hungareze të shëndetit kanë izoluar një spital në Mako, në juglindje të Hungarisë, pasi deklaruan një epidemi fruthi dhe paralajmëruan të enjten se virusi mund të ketë ardhur nga kufiri në Rumani, ku ka shpërthyer në muajt e fundit.
Menaxheri i spitalit Mako, Kallai Arpad tha se pasi 12 pjesëtarë të stafit ranë në kontakt me sëmundjen, spitali është mbyllur.
“Virusi ka ardhur në spital nga dikush. Ne besojmë se mund të jetë vetëm nga Rumania, meqenëse periudha e inkubacionit është 10 ditë dhe ne kishim një pacient të tillë,” tha Kallai.
Rreth 29 raste janë raportuar në Mako, Szeged dhe Debrecen, duke prekur si personelin mjekësor dhe njerëzit e zakonshëm, sipas portalit të lajmeve delmagyar.hu.
Rumania raportoi një shpërthim të fruthit në 2016, me 3000 raste gjatë vitit dhe 1000 të tjera në dy muajt e fundit.
Qendra Europiane për Parandalimin dhe kontrollin e Sëmundjeve, ECDC, të mërkurën paralajmëroi se epidemia mund të përhapet në vende të tjera europiane, pasi spitalet belge gjithashtu raportohet se patën shtim të rasteve pas trajtimit të pacientëve rumunë.
“Duke marrë në konsideratë përmasat dhe përhapjen gjeografike të shpërthimit aktual të fruthin në Rumani, gjasat janë që rastet e eksportimit të jenë të shumta,” tha ECDC.
Instituti Kombëtar Rumun për Shëndetin Publik raportoi 3071 raste të fruthit, përfshirë 16 vdekje, nga shtatori 2016 në mesin e shkurtit 2017. Vitin e mëparshëm, në 2015 Rumania raportoi vetëm shtatë raste me fruth.
Epidemia mendohet të jetë pjesërisht prej prindërve që nuk vaksinojnë fëmijët.
Rastet më të shumta u raportuan në Rumaninë jugperëndimore, në kontetë Caras-Severin, Arad dhe Timis, në kufi me Serbinë dhe Hungarinë, ku më shumë se 1900 raste u raportuan. Shumica e tyre janë regjistruar në komunitete të varfra rurale.
Rumania ka ulur moshën e vaksinës së parë nga 12 muajsh në 9 muajsh dhe ka rekomanduar që të gjithë fëmijët deri në nëntë vjeç të vaksinohen për të kufizuar epideminë.
