Komisioni Qendror i Zgjedhjeve vendosi sot me votat e shumicës së majtë të hapë procedurë verifikimi për 21 zyrtarë, 13 deputetë dhe 8 kryetarë bashkish në bazë të ligjit për dekriminalizimin, por refuzoi të ndërpresë mandatet për kryebashkiakët Zotkaj dhe Peçi.
KQZ vendosi të enjten të mos i përgjigjet kërkesës eksplicite të Prokurorisë së Përgjithshme për heqjen e mandateve për dy kryebashkiakë socialistë, Adriatik Zotkaj i Poliçanit dhe Tërmet Peçi i Tepelenës, për të cilët Prokuroria ka kërkuar ndërprerje të mandateve për shkak se nuk kanë vetëdeklaruar disa episode penale nga jeta e tyre ose kanë dorëzuar deklaratë shtesë jashtë afatit ligjor, duke shkelur për rrjedhojë ligjin për “Verifikimin e Integritetit të personave që zgjidhen, emërohen ose ushtrojnë funksione publike”, njohur ndryshe si ligji i dekriminalizimit. Në vend të kësaj, anëtarët nga shumica parlamentare në KQZ vendosën të hapin një procedurë kundër të gjithë zyrtarëve, deputetëve dhe kryebashkiakëve, të cilët kanë dorëzuar deklarime shtesë ose i kanë dorëzuar formularët jashtë afateve ligjore.
Me një vendim të enjten, KQZ injoroi hapur kërkesën e Prokurorisë kur votoi “kundër shpalljes së pavlefshmërisë dhe përfundimit e parakohshëm të mandatit për funksionarët”, përfshirë Zotkajn dhe Peçin.
Prokuroria pati kërkuar dy javë më parë heqjen e mandateve të Zotkajt, kryebashkiak i Poliçanit që nga viti 2003 dhe të Peçit, kryebashkiak i Tepelenës që nga viti 2011, që të dy të Partisë Socialiste.
Sipas Prokurorisë, kryebashkiaku Peçi e ka dorëzuar formularin e tij të parë më 21 prill 2016 dhe nuk ka deklaruar në të një dënim të formës së prerë me 150 mijë lekë gjobë të vitit 2004 për veprën penale të “përdorimit të dokumenteve të falsifikuara”.
Ndërkohë, kryebashkiaku i Poliçanit, Adriatik Zotkaj ka deklaruar tre dënime gjyqësore në formularin e dorëzuar më 22 prill 2016 në Komisionin Qendror të Zgjedhjeve, por nuk ka reflektuar në të një dënim të vitit 1985.
Emrat e Tërmet Peçit dhe Adriatik Zotkajt ndodhen në listën e 12 zyrtarëve të cilët i kërkuan Komisionit Qendror të Zgjedhjeve të ndryshojnë apo të plotësojnë vetëdeklarimet e tyre për pastërtinë e figurës, duke argumentuar se nuk e kishin kuptuar ligjin.
Prokuroria ka nisur njëkohësisht hetimet ndaj Komisionit Qendror të Zgjedhjeve me argumentin se ka pranuar plotësime shtesë në formularët e vetëdeklarimit, plotësim që nuk parashikohet në ligjin për dekriminalizimin. Komisioni Qendror i Zgjedhjeve u mbrojt fillimisht me argumentin se Kodi i Procedurave Administrative parashikon të drejtën e qytetarëve për të plotësuar dokumentacionet e dorëzuara.
Por KQZ duket se ndryshoi mendim të enjten, kur vendosi të riverifikojë deklarimet e plotësuara jashtë afatit ligjor, duke refuzuar njëkohëisht për herë të dytë kërkesën e Prokurorisë së Përgjithshme. Anëtarët e opozitës në KQZ protestuan ndaj vendimit të shumicës.
Sipas KQZ, deputetë të shumtë si Sali Berisha, Arben Ristani, Eduard Halimi, Florion Mima, Myqerem Tafaj, Spartak Braho, Vangjel Dule etj., duhet të riverifikohen.
Më herët, KQZ refuzoi kërkesën e Prokurorisë për heqjen e mandatit të deputetit Armando Prenga, i cili nuk pati deklaruar probleme që ka pasur me drejtësinë italiane në mesin e viteve 1990. Sipas Prokuorisë, Prenga nuk ka deklaruar në formularin e tij një dënim penal në Shqipëri për falsifikim dokumentesh si dhe precedentët penalë në Itali për “vjedhje pasurish, falsifikime në përgjithësi, marrje të pasurisë së vjedhur, deklarata për identitet të rremë” në qytetin e Milanos, ku njihej edhe me emrin Mondi.
KQZ e refuzoi kërkesën e prokurorisë dhe deklaroi se ka kërkuar informacion shtesë. Prokuroria iu përgjigj menjëherë me informacion shtesë, por në fund, Prenga deklaroi dorëheqjen nga posti i deputetit dhe KQZ vendosi të mbyllë procedurën pa vendim me argumentin se objekti kishte pushuar së ekzistuari.
