Kryeredaktorja e gazetës ‘Zëri’, Arbana Xharra thotë se nuk do të ndalojë së investiguari anën e errët të jetës në Kosovë pavarësisht fushatave publike të kanosjeve ndaj saj – të cilat janë bërë normale për gazetarët investigativë në vend.
Arbana Xharra, kryeredaktore e gazetës Zëri në Prishtinë prej mëse një dekade ka qenë objektiv i sulmeve të shumta dhe madje edhe kërcënimeve të shumta për shkak të nuhatjes së saj për artikuj investigativë.
Akti më i fundit i kërcënimit ishte ajo e bojës së kuqe në ngjyrë gjaku nga autorë të panjohur krah apartamentit të saj, aty ku Xharra jeton me bashkëshortin dhe djalin.
Të hënën, gazetarja publikoi fotografitë jashtë apartamentit të saj, ku vandalët kishin pikturuar një kryq me ngjyrë të kuqe. I njëjti simbol ishte ngjyrosur edhe në garazhin ku ajo parkon makinën.
“U tmerrova nga ky ‘gjak’,” tha ajo për BIRN. “M’u duk pikërisht ashtu – kur pashë kryqin e ngjyrosur në mur – derisa bashkëshorti më tha se ishte thjesht bojë,” shtoi Xharra.
“Mendjen e kisha te fëmija në çastin kur e pashë se njerëzit që po më kërcënonin e dinin mirë se ku jetoja dhe parkoja makinën”.
Xharra, një gazetare që prej vitit 2001, është përballur me lloje të ndryshme kërcënimesh që kur filloi të investigonte korrupsionin.
“Jam kërcënuar në mënyra të ndryshme, më kanë ndjekur me makinë, më kanë paditur… ka pasur përpjekje për të më mbyllur gojën me presione të ndryshme,” tha ajo.
Kërcënimet më serioze filluan në 2012, kur ajo publikoi artikullin e saj të parë investigativ në partneritet me BIRN rreth shtimit të ekstremizmit fetar në Kosovë.
Pasi u shpall publikisht “islamofobike”, “përndjekja e saj publike” filloi me zell, tha ajo.
Kundër gazetares filloi një fushatë e egër në mediat sociale. “Dikush më dërgoi një foto të djalit tim, që u përhap kudo në Facebook, ku shkruhej: “Shikoni këtë ‘shejtan’ të vogël, djalin e Arbanës”, tha Xharra për BIRN.
Ajo është akuzuar për shumë krime të tjera, si nga kritikët dhe nga ata me të cilët ajo ka pasur debate.
Xharra kujton kohën kur një zyrtar i Vetëvendosjes, Arbër Zajmi, e akuzoi Xharrën në Facebook bashkë me presidentin Hashim Thaçi, kryeministrin Isa Mustafa dhe ish-kryeministrin shqiptar Sali Berisha se po “shisnin ose falnin me mijëra kilometra tokë të Kosovës”, duke iu referuar mbështetjes së tyre për ratifikimin e marrëveshjes së demarkacionit mes Kosovës dhe Malit të Zi, të cilin Vetëvendosje e ka kundërshtuar me forcë.
Kjo çoi në diskutime të nxehta publike mes Xharrës dhe disa zyrtarëve të Vetëvendosjes, dhe më vonë në një fushatë të shëmtuar publike kundër saj.
“Përveç radikalizmit fetar, jam marrë me shtrirjen e agjendës së presidentit turk Rexhep Tajip Erdogan në Maqedoni,” thotë Xharra, duke shtuar se kjo pjesë e punës i kishte sjellë më shumë telashe me admiruesit dhe aleatët e Erdoganit në Maqedoninë fqinje.
“Media e mbështetur nga partia [shqiptare] Besa në Maqedoni ka përhapur propagandë kundër meje, duke pretenduar se familja ime është e lidhur me ish-regjimin [e urryer] të [liderit serb Sllobodan] Millosheviç”.
Sipas Xharrës, kthimi në objektiv i fushatave denigruese dhe marrja e kërcënimeve është norma e re për gazetarët investigativë në Kosovë, por edhe në vendet e tjera të Ballkanit.
“Linçimi publik i gazetarëve po bëhet një normë në Kosovë,” tha ajo. “Kërcënimi i familjeve dhe terrorizimi i fëmijëve kalon çdo kufi” – por gjithsesi ndodh, shtoi ajo.
Xharra nuk fajëson policinë e Kosovës, që sipas saj e ka bërë punën kur i raportohen rastet e kërcënimeve dhe kanosjes. Problemet ndodhet diku tjetër, thotë ajo: “Hetimet ngecin në prokurori”.