Presidenti Aleksandër Vuçiç tha të hënën se i kishte bindur deputetët e partisë së tij të votonin kryeministren e zgjedhur Ana Brnabiç – pavarësisht pakënaqësisë së hapur për caktimin e një figure jo-partiake, e cila është gjithashtu një lesbike.
Presidenti serb dhe kreu i Partisë Progresive, Aleksandër Vuçiç i bindi të hënën deputetët e partisë së tij që të mbështesin Ana Brnabiç si kryeministren e parë të Serbisë. “Nuk ishte e lehtë,” tha Vuçiç në një konferencë për shtyp pas takimit.
Marija Obradoviç, nga partia e Vuçiç lajmëroi se sesioni parlamentar për konfirmimin e Brnabiç do të fillojë “nga fundi i javës”, por shtoi se partia fillimisht duhet të negociojë me partnerët e saj të koalicionit për të siguruar mbështetje të mjaftueshme.
“Nëse konfirmimi nuk bëhet, do të kemi zgjedhje të parakohshme. Asnjë prej nesh nuk është i kënaqur me këtë perspektivë, por disa gjëra nuk mund të detyrohen,” tha Obradoviç.
Vuçiç tha më herët se donte që qeveria e re të betohej para ceremonisë së inaugurimit të tij më 23 qershor, por është e paqartë nëse koalicioni qeverisës do të marrë mbështetje të mjaftueshme deri atëherë.
Partia Progresive ka 102 nga 250 vende në parlament dhe Brnabiç duhet të marrë 126 vota për t’u konfirmuar. Partia Socialiste, partnere e koalicionit të Progresivëve, ka 22 vende.
Analistët dyshojnë të ketë nevojë për zgjedhje të parakohshme, por pajtohen se pakënaqësia në radhët e koalicionit të Vuçiçit për nominimin është diçka e vërtetë.
“Kjo ndodh për shkak se kryeministrja nuk është anëtare e partisë, ndërkohë që arsyeja tjetër është orientimi i saj seksual,” tha Boban Stojanoviç, nga Fakulteti i Shkencave Politike në Beograd, duke iu referuar orientimit të saj haptazi homoseksual.
Megjithatë, ai nuk beson se Vuçiç rrezikon të hasë probleme të mëdha brenda partisë së tij.
Sociologu Vladimir Goati bie dakord që shumë deputetë progresivë kanë shpresuar që kryeministri i ri të ishte nga radhët e tyre.
“Kishte shumë kandidatë [për postin e kryeministrit], dhe me siguri ata janë ndjerë të privuar dhe të zemëruar”, shtoi Goati.
Si Goati dhe Stojanoviç thanë se i konsideronin zgjedhjet e reja të pamundura.
“Gjithmonë ekziston mundësia, ashtu si mundësia që toka të goditet me një kometë, por shanset janë shumë të vogla,” tha Goati.
