Shoferi i Konsullit të Kosovës në Nju Jork përballet me akuza për trafikim armësh dhe droge, si dhe pastrim parash, i arrestuar nga një aksion i DEA në SHBA.
Puna e përditshme e Albert Veliut ishte si i punësuar pranë Ministrisë së jashtme të Kosovës, duke drejtuar automjetin e konsulles kosovare Teuta Sahaqija në rrugët e mbushura me trafik të Nju Jorkut.
Megjithatë, sipas akuzave të ngritura kundër tij në një gjykatë në Bruklin të martën, ai gjithashtu drejtonte një operacion fitimprurës si kontrabandues armësh, trafikant droge dhe pastrues parash, ndërsa mbante lidhje me Cosa Nostra dhe me figura shqiptare të krimit të organizuar në Nju Jork dhe Republikën Çeke.
Si pjesë e një aksioni të Agjencisë së Rendit për Drogën, DEA, Veliu akuzohet se i ka shitur një agjenti të fshehtë 15, armë të tipit AK-47 dhe një anti-tank raketë-hedhës të periudhës jugosllave.
Ai i kishte siguruar armët gjatë një udhëtimi në Kosovë më herët këtë muaj, përpara se të kthehej në Nju Jork më 21 qershor, nga ku drejtonte operacionet. Më 27 qershor, katër nga bashkëpunëtorët e tij u arrestuan në Klina, në perëndim të Kosovës, me armë, ndërsa Veliu dhe pesë të tjerë u arrestuan në Kosovë.
Veliut iu tha se kartelet meksikane të drogës kishin nevojë për armët për të luftuar një luftë droge pranë kufirit amerikan.
34-vjeçari gjithashtu dyshohet se ka pastruar 800.000 dollarë të dyshuara si para droge përmes një seri kompanish me ndihmën e bashkëpunëtorëve, përfshirë të vëllai, Alban Veliu.
Alban Veliu, Dilber Kukic, Ekram Sejdija, Xhevat Gocaj dhe Agim Rugova gjithashtu janë akuzuar për pastrim parash.
Në një seri përgjimesh me agjentët e DEA, Veliu mburrej se kushëriri i tij ishte Aleks Rudaj, një lider shqiptar i njohur për krimin e organizuar në Nju Jork, sipas padisë që BIRN e disponon.
Në 2006, Rudaj u dënua për shantazh dhe u dënua me 27 vjet burg në SHBA.
Veliu gjithashtu tha se vjehrri i tij ishte “lideri i një faksioni shqiptar të krimit të organizuar në Republikën Çeke”, duke shtuar se ishte i interesuar në transportimin e sasive të mëdha të parasë kesh në Republikën Çeke dhe vendet e Europës Lindore për t’u pastruar duke u kthyer në SHBA”.
BIRN nuk arriti ta identifikonte vjehrrin e tij.
Veliu dhe një tjetër i pandehur, Christopher Curanoviç, një bashkëpunëtor i La Cosa Nostra, janë akuzuar me ndërmjetësim të shitjes së 2 kg marijuane te një burim i besuar i DEA-s.
Anthony Noterile, një tjetër partner i krimit të organizuar italian, është akuzuar për pastrim parash.
Fitim Sadiku, sekretar i përgjithshëm i Ministrisë së Jashtme, konfirmoi se Veliu kishte punuar si “shofer për Konsullatën e Përgjithshme të Republikës së Kosovës në Nju Jork,” duke shtuar: “Ka punuar si shofer për ca kohë, por nuk e dimë se për sa gjatë.”
Të akuzuarit ende nuk janë dëgjuar.
