Disa ditë pas goditjes së një grupi të dyshuar të trafikut të narkotikëve në Itali, policia dhe prokuroria shqiptare janë vënë në lëvizje duke sekuestruar sasi të mëdha kanabisi në Vlorë
Ish-kryeministri Sali Berisha ishte i pari që njoftoi dje në mbrëmje sekuestrimin sipas tij të 10 tonëve drogë në një shtëpi në Babicë të Vlorës. Berisha postoi një video, që tha se e kishte marrë prej
“qytetarit dixhital” një alias që ai përdor për të gjithë ata që i shkruajnë denoncime.
Video që duket se është realizuar nga një prej punonjësve të policisë që merrte pjesë në operacion, tregonte një bodrum të mbushur me thasë, në të cilët policia thotë se është gjetur drogë. Më pas një video e dytë tregon një kamion me ngjyra ushtarake që trasporton ngarkesën me thasë të presuar.
Drejtori i Përgjithshëm i Policisë Haki Çako, konfirmoi sekuestrimin e 4.5 tonëve drogë, në një dalje për shtyp ku njoftoi edhe shkarkimin e 12 drejtuesve të policisë në Elbasan, pas dështimit të policisë atje për të ndërhyrë në përplasjen mes dy bandave lokale.
Operacioni i Babicës është sipas Çakos vijim i goditjes së një organizate kriminale drejtuesit e të cilës u arrestuan disa ditë më parë në Itali, në përgjimet e të cilëve përmendet edhe emri i ish-Ministrit të Brendshëm Sajmir Tahiri. “Është një hetim në kuadër të dosjes së grupit të strukturuar kriminal Habilaj, në bashkëpunim me Prokurorinë dhe partnerët ndërkombëtarë”, tha Çako.
Policia njoftoi edhe shoqërimin e disa personave, por Çako tha se detajet e operacionit do të bvëheshin të ditura në një kohë të dytë.
Operacioni i Babicës u pasua nga akuza dhe kundërakuza politike. Ish-Kryeministri Berisha e cilësoi drogën e sekuestruar pronë e “klanit Rama-Tahiri”. Sipas Berishës droga ishte gjetur në shtëpinë e “Armand Koçerri mik i Habilajve”, po ashtu sipas tij vila ishte e ruajtur me kamera dhe sistem sigurie.
Ndërkohë kryeministri iu përgjigj në Facebook duke akuzuar opozitën dhe median për sulm ndaj policisë.
“E turpshme përpjekja e Frontit të Çorbës së Vjetër për të baltosur Policinë e Shtetit për operacionin e suksesshëm mbrëmë në Vlorë, si pjesë e luftës ndaj rrjetit kriminal të heronjve të kazanit politik e mediatik të 48 orëve të fundit”, shkroi Rama.
Prej javësh Policia e Shtetit është nën presion publik për rritjen e kriminalitetit në vend dhe pamundësinë e saj për ta luftuar dhe akuzat e opozitës për lidhje të saj dhe drejtuesve të shumicës me krimin. Po ashtu edhe përgjimet e fundit të antimafias italiane tregojnë implikim të disa drejtuesve të policisë me krerët e grupeve kriminale.
Gjatë deklaratës për shtyp Çako u bëri thirrje qytetarëve që të besonin policinë. “Kini besim të plotë tek Policia e Shtetit. Lëkundjet në misionin e saj janë një fenomen që duhet mirëkuptuar si pjesë e një procesi reformimi e transformimi rrënjësor që ka nisur, por nuk ka mbaruar”. Ai premtoi goditje të grupeve kriminale dhe pastrim të policisë, ndërsa tha se vetëm në 9 muaj ishin sekuestruar 35 milion euro pasuri kriminale.
