Komisioni Qendror i Zgjedhjeve në Kosovë pritet të shpallë rezultatet paraprake të zgjedhjeve vendore. Megjithatë, rreth 17 komuna do të kalojnë në raundin e dytë.
Teksa Kosova pret për rezultatet e zgjedhjeve vendore të të dielës, rreth 17 komuna tashmë duken të vendosura të vazhdojnë garën, sipas të dhënave nga OJQ-ja Demokracia në Veprim, e cila monitoroi procesin.
Banorët e Prishtinës po vëzhgojnë garën e ngushtë mes kryebashkiakut aktual, Shpend Ahmeti nga Vetëvendosje – që sipas DIA ka fituar 44.27 për qind të votave – dhe Arban Abrashi kandidatit nga partia konservatore Liga Demokratike e Kosovës, LDK, që mori 35.7 për qind.
Të tjera komuna që do të vazhdojnë garën elektorale janë Kamenica, Rahoveci, Malisheva, Prizreni, Mitrovica e Jugut, Ferizaj, Istog, Vushtrri, Gjakova, Gjilan, Dragash, Kacanik, Klina, Obilic, Shtime dhe Suhareka.
Vetëvendosje, që e dyfishoi mbështetjen me vota në zgjedhjet e kësaj vere kryeson në shtatë komuna, ndërsa LDK, Partia Demokratike e Kosovës, PDK dhe Aleanca për Ardhmërinë e Kosovës, AAK kanë ruajtur disa nga bastionet e tyre pa nevojën e një raundi të dytë.
Kryeministri Ramush Haradinaj përgëzoi “partitë dhe veçanërisht qytetarët për sjelljen e tyre dinjitoze” në ditën e zgjedhjeve. Ai shtoi se partia e tij, AAK, fitoi tre komuna me garën e parë: Junik, Deçan dhe Obiliç. Ai gjithashtu tha se AAK drejton në Gjakovë dhe se partia dyfishoi komunat që kishte më parë.
Bazuar në të dhënat paraprake të DIA-s, Bekim Jashari, i cili është nipi i komandantit të UÇK-së, Adem Jashari, fitoi Skanderajn, si i pavarur. Kandidatura e tij u mbështet nga PDK-ja, Iniciativa për Kosovën, NISMA dhe AAK.
Siç pritej, Lista Serbe ka fituar në disa komuna me shumicë serbe, si Mitrovica e Veriut, Leposaviç, Novobërda, Shtërpcë, Zubin Potok, Graçanicë, Ranillug dhe Partesh.
Presidenti serb Aleksandar Vuçiç përgëzoi Listën Serbe për fitoren në zgjedhjet lokale në të gjitha komunat me shumicë serbe në Kosovë.
“Dua vetëm t’ju përshëndes të gjithëve, t’ju përgëzoj për suksesin e jashtëzakonshëm dhe të them se populli ynë në Kosovë dhe Metohi ka treguar edhe një herë se mund të luftojë për mbijetesën e vet, por edhe për vendin e tij, Serbinë”, tha Vuçiç.
Ndërsa ka pasur disa arrestime për mashtrim të votuesve, zgjedhjet përgjithësisht kaluan të qeta, ku pjesëmarrja ishte 43.79 për qind. Votimet u mbyllën në orën 7:00 të mbrëmjes siç qe parashikuar.
Policia arrestoi dy persona pasi BIRN Kosova raportoi se disa qytetarëve u ishte ofruar kafe dhe ushqim në këmbim të votave për PDK-në në Fushë Kosovë.
Një kamerier, Dardan Bylykbashi, punonte në një kafene të zotëruar nga një anëtar i familjes së Migjen Kolshit, një kandidat i PDK në Këshillin Komunal të Fushë Kosovës. Ai u filmua në tre raste të ofronte kafe dhe ushqim për klientët duke i kërkuar të votonin për “numrin 5” në listën e anëtarëve të këshillit të PDK.
Gjatë ditës policia kufitare në pikën Jarinje të Kosovës veriore ndaloi një kamion që kishte eksplozivë dhe disa granata dore. Kamioni po përpiqej të hynte në Kosovë nga Serbia.
Deri në kohën e publikimit, nuk u zbuluan lidhje mes incidentit dhe zgjedhjeve.
Raundet e dyta për zonat e nevojshme do të mbahen brenda dy javëve.
