Gjykata Penale e Shkupit të enjten dha dënime me burgim të përjetshëm për shtatë nga 37 të pandehurit etnikë shqiptarë të akuzuar për përfshirje në një shkëmbim dy ditor zjarri me policinë në Kumanovë në vitin 2015, ndërsa shumica e të tjerëve mori dënime të gjata me burg.
Një gjykatë në Shkup të enjten dënoi me burgim të përjetshëm shtatë nga 37 të pandehurit e akuzuar për pjesëmarrje në një shkëmbim dy ditor zjarri me policinë në qytetin verior maqedonas të Kumanovës në maj 2015.
Trembëdhjetë persona u dënuan me nga 40 vjet burg, gjashtë me nga 20 vjet burg, njëri me 18 vjet burg, dy me nga 14 vjet burg, dy me nga 13 vjet burg dhe dy u dënuan me nga 12 vjet burg. Katër nga 37 të pandehurit u liruan nga akuzat.
Të pandehurit u gjetën fajtorë për terrorizëm, ose për pjesëmarrje dhe ndihmesë në një shkëmbim dy-ditor zjarri me forcat maqedonase të sigurisë ku mbetën të vdekur 18 vetë, përfshirë tetë policë, në qytet.
Policia speciale u vendos rreth dhe brenda ndërtesës së gjykatës për dhënien e vendimit një këtë çështje.
Atmosfera në gjykatë ishte gjithashtu e tensionuar. Vetëm tre të pandehur u lejuan të dëgjonin personalisht vendimet ndaj tyre. Gjykatësi urdhëroi që të tjerët të nxirreshin jashtë për shkak të protestave të tyre të zhurmshme.
“Ne nuk jemi terroristë! Ne jemi Ushtria Kombëtare Çlirimtare! Terroristët sulmuan parlamentin ndërsa ju na sulmuat ne!” bërtiti një nga të pandehurit para se të nxirrej nga gjykata.
Ai i referohej sulmit të 27 prillit në parlamentin maqedonas nga mbështetësit e ish-partisë qeverisëse VMRO DPMNE.
Të pandehurit do të kenë një mundësi të apelojnë kundër vendimit para Gjykatës së Apelit.
Në seancën e fundit dëgjimore në shtator, avokatët e të pandehurve, në deklaratat e tyre mbyllëse, këmbëngulën se provat kundër klientëve të tyre ishin të pamjaftueshme dhe rrethanore dhe thanë se ata duhej të liroheshin.
Disa nga të pandehurit që kishin pranuar pjesëmarrjen në përplaset e armatosura me policinë në Kumanovë, pohuan se ata ishin viktima të një strukture të motivuar politikisht.
Gjyqi filloi në shkurt 2016. Por në qershor të vitit të kaluar, procedurat u desh të rifillonin nga e para pasi prokuroria e shkriu çështje me një tjetër, në të cilën tetë vetë dyshohet se kanë ndihmuar grupin e armatosur.
Prokuroria tha se burrat vodhën armë nga një stacion policor, të cilat ata më pas i përdorën për të sulmuar forcat e sigurisë në Kumanovë më 9 dhe 10 maj 2015.
Të pandehurit mohuan të kenë sulmuar policinë dhe këmbëngulën se ata thjesht po mbroheshin vetë nga sulmi.
Çështja dhe polemikat që e rrethojnë atë ka gjasa të mos mbarojnë me vendimin e gjykatës. Në shtator, duke iu drejtuar shqetësimeve publike në lidhje me këtë çështje, kryeministri i ri i Maqedonisë Zoran Zaev, qeveria e qendrës së majtë e të cilit u zgjodh në maj, tha se ai ishte pro një rigjykimi.
Nëse kjo ndodh, autoritetet mund të kërkojnë ndihmë ndërkombëtare dhe mbikëqyrje për të larguar të gjitha dyshimet në lidhje me çështjen.
Një grup special ekspertësh gjyqësor që po punojnë për reformat gjyqësore aktualisht është duke shqyrtuar një ligj të posaçëm që do të lejonte rigjykimin për këtë çështje dhe çështje të tjera në të cilat ka ndërhyrë qeveria e kaluar e udhëhequr nga VMRO DPMNE, e cila qëndroi në pushtet për 11 vjet.
