Ndërsa deputetët socialistë dëgjuan 7 kandidaturat për Prokuror të Përkohshëm të Përgjithshëm, opozita që bojkotoi seancën dëgjimore në Komisionin e Ligjeve akuzon kryeministrin se po kryen shkelje të kushtetutës dhe se kërkon të kapë drejtësinë
Opozita bojkotoi seancën dëgjimore me kandidatë për Prokuror të Përgjithshëm të përkohshëm, ndërsa më herët kryetarja e LSI Monika Kryemadhi dhe ai i PD Lulzim Basha sulmuan shumicën se po synonte marrjen nën kontrol të institucioneve të drejtësisë duke shkelur kushtetutën dhe me qëllim mbylljen e dosjeve hetimore.
Socialistët nga ana e tyre, përsëritën ftesën publike për pjesëmarrje të opozitës, ndërsa vijuan përpos kësaj me dëgjimin e 7 kandidaturave për postit vakant që prej javës së parë të dhjetorit. Kandidatët Arqile Koça, Arta marku Artur Selmani, Besnik Muçi, Ferdinad Elezi, Ermira Tafani dhe Granit Shahu, prezantuan platformat e tyre, ndërsa kryesisht kritikuan sistemin e promovimit dhe trasferimeve që sipas tyre nuk kishte qenë i bazuar në meritë dhe disa probleme të tjera të prokurorisë.
Përplasja mes palëve politike ishte e parashikueshme, pas vonesave në ngritjen e Këshillit të Lartë të Prokurorisë ku mungon ende kandidati nga shoqëria civile e cila në një letër publike sëfundmi shpjegoi se nuk kishte kandidatë që përmbushnin kriterin e të qenit 15 vjet jurist dhe mbarimit të mandatit të Adriatik Llallës në fillim të këtij muaji.
Debati sidoqoftë u ashpërsua vetëm pak ditë më parë, pasi u bë e qartë se Partia Socialiste do të synonte emërimin e një Prokurori të Përgjithshëm të Përkohshëm sipas dispozitës kalimtare në ligjin “Për organizimin dhe funksionimin e Prokurorisë në Republikën e Shqipërisë” qoftë kjo edhe me shumicë të thjeshtë.
Lulzim Basha në një konferencë për shtyp për këtë çështje u tha gazetarëve se ajo që synonte shumica ishte “dhunim flagrant i kushtetutës”. “Ne nuk do të pranojmë kurrë një shkelje flagrante të Kushtetutës, me qellimin e vetëm për të emëruar Edi Ramën, përveçse kryeministër me vota të vjedhura, edhe kryeprokuror në shkelje të Kushtetutës me një qëllim-mbylljen e dosjeve të krimit dhe korrupsionit dhe zhytjen e Shqipërisë edhe më thellë në rekordet e zeza të narkoshtetit”, tha Basha.
Kryetarja e LSI Monika Kryemadhi mbajti pak a shumë të njëjtin qëndrim. “Rrëmbimi i Kryeprokurorit të Përgjithshëm, mënyra arrogante se si po veprohet nga mazhoranca tregon frikën që ka mazhoranca për çështjen Tahiri dhe kjo është një nga arsyet që po nxiton për të shkelur Kushtetutën në mënyrë të tillë”, tha ajo megjithëse ndryshe nga PD, LSI e ka votuar ligjin “Për organizimin e prokurorisë”, përfshi dispozitën kalimtare që përmend prokurorin e përkohshëm.
Kryemadhi po ashtu u tha gazetarëve se nuk kishte komunikuar me bashkëshortin, njëkohësisht Presidentin e Republikës Ilir Meta rreth çështjes pasi nuk ishin takuar prej 12 ditësh, ndërsa ironizoi shoqërinë civile se nuk kishte në gjendje të sillte një kandidat për Këshillin e Lartë të Prokurorisë.
Të dy akuzuan Ramën se po pengonte procesin qëllimisht për të mos lejuar ngritjen e Prokurorisë së Posaçme dhe Byrosë së Hetimit. Zërit të dy partive opozitare iu bashkua edhe PDIU që ka në kuvend tre deputetë të cilët deri tani kanë votuar në favor të nismave të qeverisë.
Kryeministri që iu përgjigj në faqen e tij në Facebook vetëm Bashës duke i cilësuar akuzat e tij qesharake. Rama aludon se Basha akuzoi komunitetin ndërkombëtar se kërkonte të mbyllte dosjet. “A ka budalla që e beson se SHBA/BE duan prokuror të përkohshëm për të mbyllur dosje hetimore duke shkelur Kushtetutën!Hajde politikë hajde”, shkroi Rama i cili nuk e përsëriti ftesën për opozitën që të marrë pjesë në proces. Si Basha ashtu edhe Kryemadhi, e cila propozoi ndryshime kushtetuese për ta hequr anëtarin e shoqërisë civile, refuzuan ftesën dhe e cilësuan nismën të paligjshme.
Ndërkohë në seancën dëgjimore të komisionit të ligjeve 7 personat që kandiduan pas thirrjes së shumicës parlamentare për postin, prezantuan platformat e tyre dhe iu përgjigjën disa pyetjeve. Ata u ankuan për mënyrën se si ishte drejtuar deri tani Prokuroria e Përgjithshme, thanë se promovimet nuk ishin bërë në bazë të meritës dhe premtuan ta ndryshonin këtë.
Po ashtu kandidatët thanë se centralizimi i prokurorisë kishte qenë një prej defekteve kryesore të saj dhe se institucionit i mungonin hetimet proaktive. Pas dëgjimit të kandidatëve komisioni i ligjeve pritet të dalë me një raport që do i paraqitet kuvendit.
