Ministria e Drejtësisë kërkoi hetim disiplinor nga KLD për kryetarin e Gjykatës së Shkodrës, pasi një hetim gjeti fshehje të një dënimi për kancelarin e kësaj gjykate. Të dy të përmendurit mohuan akuzat, ndërsa kreu i gjykatës tha se gabimi ishte bërë nga kryesekretarja e shkarkuar prej tij.
Ministrja e Drejtësisë, Etilda Gjonaj kërkoi nga KLD hetim disiplinor për kryetarin e Gjykatës së Rrethit të Shkodrës, Arben Zefi. Ai dyshohet se ka fshehur dënimin penal për kancelarin e kësaj gjykate, Artan Dragoni, për të cilin ministrja ka kërkuar marrjen e masave nga ana e Departamentit të Administratës Publike për vetëdeklarim të rremë.
Si Zefi ashtu edhe Dragoni mohuan akuzat. Kryetari i Gjykatës i tha BIRN se kishte qenë kryesekretarja, tani e shkarkuar prej tij që nuk kishte kryer si duhet procedurat. Ndërsa Dragoni mohoi të ishte dënuar penalisht.
“Nga hetimi i ndërmarrë ka rezultuar se Gjykata e Rrethit Gjyqësor Shkodër, në shkelje të ligjit, nuk ka përcjellë pranë Drejtorisë së Përgjithshme të Burgjeve shkurtimin e vendimit penal të formës së prerë për dënimin e shtetasit A.D, aktualisht kancelar i Gjykatës së Rrethit Gjyqësor Shkodër, për veprën penale të parashikuar nga neni 290/1 i K.Penal”, thuhet në kërkesën e ministres Gjonaj për procedimin disiplinor.
Në njoftim thuhet se për pasojë të mospërcjelljes së këtij vendimi, në Regjistrin e Gjendjes Gjyqësore, “ky shtetas rezulton në mënyrë të paligjshme si i padënuar nga gjykatat penale shqiptare”.
Ministria e Drejtësisë po ashtu i ka kërkuar Departamentit të Administratës Publike të marrë masat e parashikuara nga ligji ndaj kancelarit, “pas konstatimit të faktit se ka bërë deklarim të rremë në formularin e vetëdeklarimit”.
Ndërkohë kreu i Gjykatës së Shkodrës, Arben Zefi i tha Birn se këto mangësi kishin qenë në gjykatë para se ai të merrte detyrën. “Nuk është faji im, por i kryesekretares. Kur mora detyrën si kreu i Gjykatës, konstatova mangësi. Për këtë janë marrë masa urgjente,” thotë Arben Zefi, duke nënkuptuar se ai kishte shkarkuar personin përgjegjës. Por Zefi nuk mohoi akuzat ndaj kancelarit.
Dragoni i tha BIRN se ishte përfshirë në një aksident, por vendimi ishte pezulluar dhe më pas parashkruar, duke thënë se për këtë nuk e kishte përfshirë në vetëdeklarim. Ai po ashtu mohoi të kishte ndërruar mbiemrin, siç edhe akuzohej. “Ka patur pezullim ekzekutimi vendimi dhe vepra është e parashkruar dhe nuk përfshihet në formular. Gjithçka është korrekte. Madje dhe mbiemri im në dokumenta është Dragoni dhe dikur në vitet 70-të, paraardhesit e mi e kanë patur Dragani dhe unë nuk kam ndryshuar mbiemër”, tha ai.
Ndërkohë ai akuzoi se mbi të po bëhej një “lojë e pisët”.
