Presidenti i Shqipërisë Ilir Meta sinjalizoi ngurrim të mëtejshëm për t’i dhënë qeverisë autoritetin për të negociuar kufirin detar me Greqinë – pavarësisht frikës se vonesa mund të pengojë perspektivën e integrimit Europian të vendit.
Presidenti i Shqipërisë Ilir Meta u takua të premten me nje grup deputetësh nga komisioni për politikën e jashtme duke kërkuar më shumë bisedime mbi kërkesën e qeverisë për autorizim për negocimin e një marrëveshjeje të re për kufirin detar me Greqinë.
Në një deklaratë për shtyp pas takimit thuhet se presidenti ” informoi deputetët me qëndrimin e tij ndaj kësaj çështjeje, duke nënvizuar se për arritjen e një marrëveshjeje të drejtë dhe të qëndrueshme, kërkohet bashkëpunim dhe seriozitet nga të gjitha institucionet”.
Më herët, zëdhënësi i Metës mohoi aludimet se pëmes vonimit të lejes për të negociuar, presidenti po synonte të pengonte bisedimet mes të dy palëve.
Ministri i Jashtëm i Shqipërisë Ditmir Bushati dhe homologu i tij grek zhvilluan dy takime përgatitore vitin e kaluar me synimin e zgjidhjes së problemeve mes dy vendeve, disa prej të cilave janë dekada të vjetra dhe shumë të ndjeshme, përfshirë çështjen e kufirit detar dhe çështjen e të drejtave të pronësisë të shqiptarëve etnikë çamë që u përzunë nga Greqia në fund të Luftës së Dytë Botërore.
Më 14 shkurt, Bushati i kërkoi Metës autorizim për të negociuar kufirin detar. Pasi zhvilloi konsultime me ish-presidentët e vendit, Meta kërkoi informacione sqaruese shtesë më 20 shkurt.
Qeveria njoftoi këtë javë se e ka plotësuar kërkesën, por presidenti vijon të mos e japë autorizimin.
Opozita e qendrës së djathtë kërkon që vendi të shkojë në një gjykatë ndërkombëtare për të zgjidhur çështjen ndërsa ka akuzuar sakaq qeverinë se ka në plan të shesë detin.
Qeveria e sheh zgjidhjen e këtij problemi si çështje urgjente, për shkak se Këshilli Europian pritet të diskutojë marrëdhëniet me Ballkanin më vonë këtë muaj dhe rezultati i bisedimeve me Greqinë si vend anëtar mund të ndikojë në vendimin për të hapur bisedimet për anëtarësim në BE.
Meta u zgjodh president vitin e kaluar kryesisht me votat e Partisë Socialiste. Gjithsesi, partia e tij, Lëvizja Socialiste për Integrim, aktualisht e udhëhequr nga bashkëshortja e tij Monika Kryemadhi, kaloi në opozitë pas zgjedhjeve të vitit të kaluar.
Marrëdhëniet mes Metës dhe qeverisë socialiste mbeten të vështira. Për shembull, Meta ka refuzuar të dekretojë emërimin e kreut të ri të shërbimeve sekrete të vendit pasi drejtori i mëparshëm dha dorëheqjen tetorin e kaluar.
