Leku shqiptar humbi 1.8 për qind gjatë ditëve të fundit ndërkohë që Ministri i Financave Arben Ahmetaj deklaroi në Kuvend se gjatë ditëve të ardhshme pritet nënçmim i mëtejshëm i monedhës kombëtare.
Leku shqiptar humbi 0.85% të vlerës kundrejt euros të hënën në krahasim me ditën e premte, një lëvizje e pazakontë për tregun shqiptar, ku kursi i këmbimit zakonisht pëson luhatje shumë të vogla nga dita në ditë. Që nga 21 marsi, kur leku shënoi rekordin shumëvjeçar në kuotën 129.05 lekë për euro, leku është dobësuar me 1.8%. Shpejtësia e ndryshimit është një tregues që ekspertët e përdorin për të shpjeguar se diçka e pazakontë ka ndodhur në treg. Të dhënat historike të Bankës së Shqipërisë tregojnë se në fakt, lëvizjet me mbi 0.7% brenda një dite kanë qenë shumë të rralla përgjatë dekadës së fundit. Të martën, euro u këmbye me 131.45 lekë.
Ministri i Financave Arben Ahmetaj deklaroi në Kuvendin e Shqipërisë të martën se euro do të vijojë të forcohet gjatë ditëve në vijim, informacion që Ahmetaj thotë se e ka marrë nga Guvernatori i Bankës së Shqipërisë.
Nuk bëhet e qartë se për çfarë arsyeje Ahmetaj vendosi të bëjë një deklaratë të tillë publike, pasi ndërhyrjet e Bankës së Shqipërisë në tregun e këmbimit valutor i nënshtrohen një rregulloreje specifike, sipas të cilës, guvernatori nuk mund të flasë pa lejen e një këshilli dhe se vendimet për ndërhyrje në tregun e këmbimit valutor kanë karakter konfidencial gjatë kohës që ato kryhen. Rregullorja [link] e miratuar në vitin 2011, ka një klauzolë të fortë konfidencialiteti. Ahmetaj nuk tha se Guvernatori e ka informuar për “ndërhyrje” por tha se sipas guvernatorit, euro do të forcohet në ditët në vijim.
Leku shqiptar është forcuar ndjeshëm gjatë dy viteve të fundit nga kuota 140 lekë për euro në kuotën aktuale 130 lekë. Ky është një ndryshim i madh për tregun shqiptar, i cili ka njohur në përgjithësi stabilitet të konsiderueshëm. Mes viteve 2002 dhe 2008, euro u shkëmbye rreth kuotës 122 lekë ndërsa pas zhvlerësimit të pësuar në vitin 2009 si pasojë e deficiteve të larta buxhetore, euro u luhat rreth kuotës 140 lekë për më shumë se pesë vjet. Leku filloi të forcohej në nëntor 2015, por forcimi fitoi shpejtësi gjatë vitit 2017.