Ambasadat e Moskës në shtetet e Ballkanit kritikuan solidarizimin e këtyre shteteve për dëbimin e diplomatëve rusë pas helmimit të agjentit të dyfishtë Skripal dhe vajzës së tij.
Ambasadat ruse në Kroaci, Rumani dhe Maqedoni kanë kritikuar ashpër vendimet e tre vendeve për të dëbuar diplomatët në shenjë solidariteti me Britaninë për rastin e helmimit të agjentit të dyfishtë Sergei Skripal dhe vajzës së tij Yulia.
Shqipëria, Kroacia, Maqedonia dhe Rumania iu bashkuan vendeve të tjera të BE-së duke dëbuar disa diplomatë rusë të hënën.
Ministria e Punëve të Jashtme në Moskë e quajti valën e dëbimeve “një hap jo miqësor”.
“Shprehim protestën tonë të fortë pas vendimit të marrë nga një numër vendesh anëtare të BE-së dhe NATO-s për të dëbuar diplomatët rusë”, thuhet në një deklaratë të ministrisë.
“Gjesti provokues i të ashtuquajturës solidaritet të këtyre vendeve me Londrën, që ndoqi verbërisht autoritetet britanike në të ashtuquajturin ‘çështja Skripal’ dhe që nuk konsideroi rrethanat e incidentit, është një vazhdim i politikës konfrontuese për të përshkallëzuar situatën,” thuhej në të.
Ambasada ruse në Shkup paralajmëroi të martën qeverinë maqedonase “për pasoja” për vendimin e dëbimit të një diplomati rus në solidaritet me Britaninë.
Përballë pyetjeve nga gazetarët, ambasada ruse në Bukuresht dha një deklaratë të shkurtër, duke e etiketuar vendimin e Rumanisë për të deklaruar një diplomat rus, persona non grata, “shprehje të çmendurisë”.
Ambasada ruse në Zagreb gjithashtu shprehu keqardhje për vendimin e kryeministrit kroat Andrej Plenkoviç për të dëbuar një diplomat rus, duke e vlerësuar lëvizjen si “armiqësore”.
“Shprehim keqardhje të thellë që pala kroate mori një vendim të shpejtë dhe të gabuar, pasojat e të cilave do të ndikojnë negativisht në zhvillimin e mëtejshëm të marrëdhënieve tona bilaterale, përfshirë këtu tregtinë dhe ekonominë”, tha në një deklaratë ambasada ruse.
Ambasada ruse në Shqipëri, ku qeveria vendosi të dëbojë dy diplomatë rusë, nuk komentoi mbi situatën, por shpërndau deklaratën e lëshuar nga Ministria e Punëve të Jashtme në Moskë.
Ish-agjenti i dyfishtë Skripal dhe vajza e tij u helmuan në qytetin e Salisbëri, më 4 mars nga një agjent nervor i quajtur noviçok, një substancë kimike e zhvilluar gjatë epokës sovjetike. Ai jetonte aty pas një shkëmbimi spiunësh të kryer me Rusinë në vitin 2010.
Kryeministrja britanike Theresa May pretendoi se kishte “shumë gjasa” që shteti rus e orkestroi sulmin.
Të hënën, SHBA, BE-ja, Kanadaja dhe Ukraina urdhëruan dëbimin e dhjetëra diplomatëve rusë.
Gjermania, Franca, Lituania, Letonia, Estonia, Polonia, Republika Çeke, Danimarka, Finlanda dhe Holanda ndoqën shembullin e tyre.
