Gjykata e OKB-së në Hagë rrëzoi pjesërisht në apel lirimin nga akuzat të Vojisllav Sheshelit, lideri i Partisë Radikale Serbe, dhe e dënoi atë me dhjetë vjet burg për krime lufte në Serbi, edhe pse ai nuk do të kryejë burg.
Mekanizmi për Gjykatat Penale Ndërkombëtare në Hagë të mërkurën e dënoi Vojisllav Sheshelin me dhjetë vjet burg për nxitje të krimeve në Vojvodinë në Serbi gjatë luftës.
Por gjykata tha se Shesheli tashmë e ka shlyer dënimin për shkak të kohës që ai ka kaluar në paraburgim në Hagë që nga viti 2003.
Apeli i prokurorisë kundër shfajësimit të Sheshelit për krimet e luftës në Bosnje dhe Hercegovinë dhe Kroaci u hodh poshtë, edhe pse gjyqtari Theodor Meron tha se kishte pasur gabime në vendimin e shkallës së parë që e liroi nga akuzat liderin nacionalist.
Gjyqtari Meron tha se përfundimi i vendimit të shkallës së parë se nuk kishte pasur një sulm të përhapur dhe sistematik kundër jo-serbëve në Bosnje dhe Hercegovinë dhe Kroaci ishte gabim.
Meron tha se një fjalim i mbajtur nga Shesheli në Zvornik në Bosnjë në vitin 1992, në të cilin ai i bëri thirrje vullnetarëve paraushtarakë që të “pastronin” anën boshnjake të lumit Drina, ishte “një thirrje e qartë për spastrimin etnik”.
Por ai tha se kaloi “një periudhë e konsiderueshme kohore” midis fjalimit dhe krimeve që pasuan, prandaj lirimi i Sheshelit nga kjo akuzë nuk u rrëzua.
Megjithatë, fjalimi i Sheshelit për dëbimin e kroatëve nga fshati Hrtkovci në rajonin e Vojvodinës të Serbisë në vitin 1992 përbënte “një thirrje të qartë për të nxitur krime” dhe pati një pasojë të qartë dhe të menjëhershme, prandaj gjykata e dënoi atë me dhjetë vjet burg, tha gjyqtari.
Shesheli, i cili tani është deputet në parlamentin serb, nuk ishte i pranishëm në sallën e gjyqit për të dëgjuar vendimin.
Ai u lirua përkohësisht për t’u kuruar nga kanceri në nëntor 2014 dhe ka refuzuar të kthehet në Hagë që atëherë.
