Avokatë dhe OJQ i bënë thirrje parlamentit serb t’i japë fund mandatit si deputet të liderit të Partisë Radikale Serbe për shkak se ai u dënua për krie lufte nga gjykata e OKB-së në Hagë.
Avokatë dhe OJQ serbe janë shprehur se Sheshelit, i cili u dënua me dhjetë vjet burg për krime kundër njerëzimit në Serbi, duhet t’i hiqet nga mandati i tij sipas një ligji që thotë se mandati i deputetit përfundon nëse ai ose ajo dënohet me së paku gjashtë muaj burg.
Avokatja Katarina Goluboviç nga Komiteti i Avokatëve për të Drejtat e Njeriut, YUCOM, tha se mandati i Sheshelit përfundon automatikisht me ligj dhe se bordi përkatës parlamentar për çështjet administrative duhet ta pranojë këtë fakt.
“Pas kësaj, raporti nga bordi duhet të dërgohet në parlament, i cili i jep fund mandatit të Sheshelit,” tha Goluboviç për BIRN.
Ligji serb thotë qartë se mandati i një deputeti përfundon nëse atij ose asaj i jepet një dënim të pandërprerë me burg prej gjashtë muajsh ose më shumë.
Shesheli u dënua me apel nga Mekanizmi për Gjykatën Penale Ndërkombëtare të mërkurën për nxitje krimesh lufte me fjalimet nacionaliste që ai mbajti në rajonin e Vojvodinës të Serbisë gjatë luftës në vitin 1992.
Megjithatë, sipas ligjit dhe rregullores proceduriale parlamentare, deputeti duhet të paraqesë personalisht dorëheqjen e tij në parlament.
Thirrja për të hequr Sheshelin nga parlamenti fillimisht erdhi nga Nisma Rinore për të Drejtat e Njeriut, e cila bën fushatë kundër pjesëmarrjes së kriminelëve të luftës të dënuar në jetën publike serbe, ndër të tjera.
“Duke pasur parasysh se të gjitha vendimet e Këshillit të Apelit të MICT janë ligjërisht të detyrueshme për Serbinë, mandati i Vojisllav Sheshelit duhet të përfundojë,” tha YIHR në një njoftim për shtyp.
Kryetari i Shoqatës së Avokatëve të Beogradit, Vladimir Gajiç, tha se Shesheli i përmbush kërkesat për shkarkimin automatik nga parlamenti dhe se bordi parlamentar është i detyruar të arrijë në të njëjtin përfundim.
“Sigurisht që s’duhet të jemi naivë. Ligjet në Serbi nuk zbatohen për të gjithë qytetarët,” shkroi Gajiç në Twitter.
Goluboviç paralajmëroi se nuk ekziston një sanksion i tillë nëse kryetari i bordit parlamentar në fjalë, Aleksandar Martinoviç, nuk e vendos çështjen e mandatit të Sheshelit në axhendën e tij.
As Shesheli as Martinoviç nuk ishin në dispozicion për një koment.
Megjithatë, anëtarët e Partisë Radikale Serbe kanë hedhur poshtë pretendimet se mandati i Sheshelit duhet të përfundojë.
Deputeti i Partisë Radikale Nemanja Saroviç tha se nuk ka arsye ligjore për të hequr mandatin, edhe pse ai ofroi vetëm një shpjegim të paqartë.
“Ai është një njeri i lirë, kandidoi dhe u zgjodh deputet si i tillë,” tha Saroviç për shtypin në parlamentin serb, njoftoi agjencia e lajmeve Beta.
Ndërkohë, kryetarja e bordit ekzekutiv të Partisë Radikale, Vjerica Radeta, i quajti YIHR “tradhtarë” në Twitter.
Radeta gjithashtu kërkohet nga gjykata e Hagës për shpërfillje të gjykatës, pasi dyshohet se u përpoq të korruptonte dhe t’i bënte shantazh dëshmitarësh në gjyqin e Sheshelit.
Edhe pse Shesheli u dënua me dhjetë vjet burg, ai s’do të kryejë asnjë ditë burg për shkak të viteve që ai kaloi në paraburgim në Hagë pasi u dorëzua në vitin 2003.
