Grupi i Ekspertëve mbi Veprimin kundër Trafikimit të Qenieve Njerëzore i Këshillit të Europës, GRETA, ka kritikuar Hungarinë për trajtimin që ajo i bën emigrantëve.
Në raportin e tij fundit Grupi i Ekspertëve të Trafikimit të Qenieve Njerëzore i Këshillit të Europës, GRETA, ka kritikuar Hungarinë për aftësinë dhe vullnetin e saj për të zbuluar viktimat e mundshme të trafikimit të qenieve njerëzore midis emigrantëve dhe azilkërkuesve në vend.
Raporti, i botuar të premten, tha se “shqetësimet e ngritura në raportin e mëparshëm të GRETA-s për Hungarinë janë rritur nga legjislacioni më i kufizuar dhe masat për emigracionin dhe azilin”.
Bazuar në vizitën e tij të fundit në zonat e tranzitit në kufirin midis Hungarisë dhe Serbisë, ai tha se shumica e stafit që punon në zona “nuk mund të jepnin një shpjegim të qartë se cilat procedura do të ndiqeshin ose cilat ishin autoritetet kompetente për të marrë vendime për identifikimin dhe referimin e viktimave”.
Komisariati i Serbisë për Refugjatët thotë se rreth 3.700 refugjatë dhe emigrantë janë të vendosur në të 18 qendrat e pritjes në Serbi, raportoi në shkurt agjencia e lajmeve Beta.
Ka kaluar më shumë se një vit që kur Bashkimi Europian nënshkroi një marrëveshje të diskutueshme me Turqinë që pak a shumë e mbylli të ashtuquajturën “rrugën ballkanike” për emigrantët që kalojnë rajonin drejt Europës Perëndimore.
Megjithatë, marrëveshja me Turqinë nuk e ka ndalur plotësisht fluksin e refugjatëve që kalojnë vendet e Ballkanit në rrugën e tyre drejt Perëndimit.
Për emigrantët, Serbia është vendi i fundit i tranzitit para se të hyjnë në Hungarinë anëtare në BE, gjë e cila ka krijuar tensione në kufi.
“Vetë zonat e tranzitit nuk krijojnë një atmosferë besimi, që do të bënte të mundur që viktimat e trafikimit të dalin përpara dhe të diskutojnë situatën e tyre,” vuri në dukje raporti.
Ai shtoi se azilkërkuesit nuk janë mjaftueshëm të informuar për të drejtat e tyre dhe procedurat e aplikueshme.
“GRETA është gjithashtu shumë e shqetësuar se fëmijët e moshës 14-17 vjeç janë sidomos të prekshëm, sepse ata trajtohen si të rritur,” shtoi ai.
Raporti gjithashtu vuri në dukje 79 raste dëbimesh kolektive të emigrantëve të parregullt nga Hungaria në Serbi në më pak se dy javë në dhjetor 2017.
“Dëbimet kolektive ndikojnë negativisht në zbulimin e viktimave të trafikimit të qenieve njerëzore dhe ngrenë shqetësime në lidhje me pajtueshmërinë e Hungarisë me Konventën, përfshirë detyrimet pozitive për identifikimin e viktimave të trafikimit dhe për t’u ofruar atyre ndihmë dhe për të kryer një vlerësim të rrezikut për t’u siguruar që janë në përputhje me detyrimin e mos-kthimit,” tha ai.
GRETA i bëri thirrje Hungarisë që të ngrejë procedura për të identifikuar viktimat e trafikimit dhe t’i referojë ato drejt një ndihme të specializuar, si edhe t’u ofrojë viktimave mbështetje dhe ndihmë jashtë zonave të tranzitit.
Ai i kërkoi gjithashtu autoriteteve hungareze të rishikojnë procedurat e vlerësimit të moshës, për të siguruar mbrojtjen më të mirë të interesave të fëmijëve dhe që të jepet e drejta e dyshimit në rastet e paqarta.
Lideri hungarez Viktor Orban fitoi një rizgjedhje të zymtë në fillim të prillit bazuar në një platformë shumë kundër emigrantëve. “Hungarezët duan të jenë të vetmit që vendosin se kush do të jetojë në Hungari,” tha ai së fundmi.