Një inxhinier dhe një teknik miniere u arrestuan të enjten për shkelje të rregullave të sigurisë në punë, pas plagosjes së një minatori në galerinë e kromit të Kaprolla Shpk.
Një ditë pas aksidentit me pasojë plagosjen e rëndë të një minatori në Martanesh të Bulqizës, policia njoftoi arrestimin e dy punonjësve të galerisë së kromit të akuzuar për “shkelje të rregullave të sigurisë në punë”.
Policia deklaroi arrestimin e inxhinierit dhe drejtuesit teknik të minierës Jakup Gurra, 61 vjeç dhe teknikut të minierës Nerim Livani, 57 vjeç, të dy punonjës të Kaprolla Shpk, në pronësi të Qamil Hidrit dhe të afërmve të tij.
Të arrestuarit mbahen përgjegjës për aksidentin e të enjtes në galerinë e nxjerrjes së kromit në Martanesh, ku mbeti i plagosur rëndë 48-vjeçari Besnik Palamani, i cili ishte duke punuar në galeri si vagonist dhe pësoi sipas policisë aksident në vendin e derdhjes së mineralit*.
I kontaktuar nga BIRN administratori i kompanisë Qamil Hidri, nuk pranoi të komentonte arsyet e aksidentit. Hidri i tha BIRN se tani për tani “po jap xhevap tek ata”, duke nënkuptuar policinë dhe prokurorinë.
Ai tha se e rëndësishme ishte që minatori i plagosur nuk kishte rrezik për jetën dhe kishte dalë edhe nga reanimacioni i Spitalit Universitar të Traumës ku u shtrua pas aksidentit.
Ngjarja që ndodhi të enjten është e disata brenda pak javësh në galeritë e nxjerrjes së kromit në Bulqizë. Vetëm në muajt e fundit 6 minatorë janë vrarë në aksidente të ngjashme.
BIRN zbuloi në një shkrim të mëparshëm se në shumicën dërrmuese faji për aksidentet u mbetej minatorëve që humbnin jetën dhe vetëm në pak raste dënoheshin kolegë të tyre.
Ndërkohë edhe kur janë gjetur me mungesë të kushteve të sigurisë, kompanitë vetëm janë gjobitur.
Aktualisht ka rreth 110 kompani të licencuara për të shfrytëzuar rezervat e kromit në zonën e Bulqizës. Të dhënat e fundit të disponueshme tregojnë se vlera e kromit të nxjerrë në Bulqizë dhe të eksportuar, kryesisht në Kinë, arrin në rreth 100 milionë euro në vit.
*Në këtë shkrimi u saktësua se aksidenti nuk ka ndodhur nga shembja në tavanin e minierës.
