Gjykata e Apelit në Tiranë vendosi të martën të lërë në fuqi dënimin me 11 vjet heqje lirie për mashtrim dhe pastrim parash ndaj biznesmenit famëkeq Kastriot Ismailaj.
Ish-administratori i kompanisë Debt International Advisory, i ngarkuar për mbledhjen e borxheve të ish kompanisë së shpërndarjes së energjisë elektrike CEZ, në tetor të vitit 2017 u gjet fajtor nga Gjykata e Shkallës së Parë në Tiranë, pas akuzave që prokuroria ngriti për veprat penale të “mashtrim me pasoja të rënda” dhe “pastrim të produkteve të veprës penale”.
Ismailaj i ka mohuar akuzat dhe i ka cilësuar ato si të motivuara politikisht.
Hetimi ndaj Ismailit u përqendrua në dy episode të ndryshme, ai i krijimit të kompanive guackë me qëllim pastrimin e parave si dhe përfshirja e tij në mbledhjen ‘fiktive’ të borxheve të ish kompanisë CEZ Shpërndarje.
Gjatë shqyrtimit gjyqësor është e provuar se Ismailaj në vitin 2005 krijoi kompaninë”ADC”, e cila pa pasur asnjë aktivitet ekonomik kryente transaksione nё disa milionë euro.
“Vlera e transaksioneve të kryera nëpërmjet shoqërisë “ADC” ёshtё nё hyrje në vlerën 9.8 milionë dollarë dhe 800,000 euro. Ndёrsa transfertat dalëse për transaksionet jashtë vendit janë nё shumën dalje 4.1 milionë dollarë dhe 11 mijë euro,” thuhet në kërkesën për gjykim të organit të akuzës.
Prokuroria shprehet në kërkesën për gjykim se paratë e përfituara nga ADC, janё transferuar nё shoqëri dhe individë tё ndryshëm me vendodhje në Zvicër, Francë, Angli, Kongo, SHBA, si edhe në Afrikёn e Jugut.
Gjykata e ka gjetur gjithashtu fajtor Ismailajn dhe në përfshirjen e tij në mbledhjen e borxheve për llogari të opertaorit të shpërndarjes së energjisë elektrike, në periudhën kur u privatizuar nga grupi CEZ. Për këtë qëllim, në korrik të vitit 2010 Ismailaj krijon shoqërinë “DIA”.
Megjithatë, sipas Prokurorisë nga tёrёsia e tё dhёnave tё administruara gjatё hetimit “qёllimi i Kastriot Ismailaj nuk ka qenё mbledhja e borxhit tё shoqёrisë dhe as kryerja e ndonjё pune reale, por vjedhja e parave tё shoqёrisё “CEZ Shpёrndarja”.
“Kastriot Ismailaj, duke pёrdorur tё dhёna tё rreme dhe dokumenta fiktive nё bashkёpunim me shtetasin Josef Hejsek, ka pёrfituar nё mёnyrё tё kundraligjshme shumёn 512 004 420 lekë, duke i shkaktuar pasoja tё rёnda pёr shoqёrinё “CEZ Shpёrndarja”, Paratё e pёrfituara nёpёrmjet mashtrimit (vjedhjes), i pandehuri Kastriot Ismailaj nuk i ka pёrdorur me qёllim realizmin e kontratёs, por i ka rinvestuar, i ka transferuar jashtё vendit apo i ka pёrdorur pёr qёllime personale,” thuhet në kërkesën për gjykim të prokurorisë.
Në një investigim të publikuar nga Rrjeti Ballkanik i Gazetarisë Investigative, BIRN në qershor të vitit 2015 u zbuluan dokumente ku ish kreu i bordit të drejtorëve të CEZ Shpërndarje, Josef Hejsek, dhe biznesmeni shqiptar, Kastriot Ismailaj, qenë organizatorë të një skeme mashtruese të mbledhjes së borxheve, e cila i kushtoi kompanisë 4.5 milionë euro dhe shkatërroi marrëdhëniet mes CEZ dhe qeverisë shqiptare.