Gjuha e urrejtjes dhe retorika raciste janë shtuar në Kroaci, duke vënë në shenjëster kryesish serbët, personat e LGBT-së dhe romët, paralajmëroi Komisioni Europian kundër Racizmit dhe Intolerancës i Këshillit të Europës.
Një raport i publikuar të martën nga Komisioni Europian kundër Racizmit dhe Intolerancës i Këshillit të Europës, ECRI, tha se gjuha e urrejtjes në Kroaci po rritet dhe kritikoi autoritetet për përgjigjen e tyre joadekuate.
“Raporti – i cili analizon çështjet legjislative, gjuhën e urrejtjes racore dhe homo-transfobike, dhunën dhe politikat e integrimit – vë në dukje një rritje të nacionalizmit, sidomos nga të rinjtë, i cili shpesh merr formën e lëvdimit të regjimit fashist të kohës së Luftës së Dytë Botërore,” tha ECRI në një deklaratë.
Ai tha se shumica e gjuhës së urrejtjes është kundër serbëve, personave të LGBT dhe romëve, dhe kritikon atë që ai e përshkruan si “një reagim joadekuat i autoriteteve kroate ndaj një intolerance aq të madhe”.
Gjuha e urrejtjes shpesh nuk ndiqet penalisht si një vepër penale, tha ECRI.
“Shumica e rasteve të gjuhës së urrejtjes dhe dhunës së motivuar nga urrejtja trajtohen thjesht si kundërvajtje,” tha ai.
Megjithatë raporti lavdëroi përmirësimin e mbrojtjes ligjore kundër krimit të urrejtjes nëpërmjet ndryshimeve në kodin penal të Kroacisë – që përfshin një dispozitë të re që kriminalizon sjelljen e dhunshme në vende publike – por tha se legjislacioni kundër krimit të urrejtjes zbatohet rrallë.
ECRI gjithashtu vlerësoi miratimin e Ligjit mbi Partneritetet e të Njëjtit Seks të Regjistruar, por tha se paragjykimi dhe diskriminimi ndaj njerëzve LGBT vazhdon të jetë i përhapur.
Megjithatë, ai kritikoi autoritetet për zbatimin vetëm pjesërisht të strategjive kombëtare për të imponuar përfshirjen sociale të popullsisë rome të vendit.
“Romët vazhdojnë të përballen me nivele të larta përjashtimi social dhe të dhënat sugjerojnë se qasja e tyre në punësim është jashtëzakonisht e ulët dhe shifrat e braktisjes së shkollës ende të larta,” tha ai.
Ai e këshilloi Kroacinë që të fusë arsimin e detyrueshëm për të drejtat e njeriut në programin shkollor, “sidomos në lidhje me të drejtat e barabarta dhe ndalimin e diskriminimit”.
Ai këshilloi gjithashtu që Strategjia Kombëtare për Përfshirjen e Romëve duhet të rishikohet në mënyrë sistematike për të përmirësuar efikasitetin e saj.
Raporti i ECRI mbulon kryesisht periudhën deri në javën e parë të dhjetorit 2017.