Ministri i brendshëm i Bullgarisë tha se vendi do të vepronte me kërkesë të Turqisë për të hetuar 14 grupe që dyshohet se kanë lidhje me klerikun turk Fethullah Gulen, ndërsa Bosnja konfirmoi se një “Gylenist” boshnjak ishte arrestuar në Turqi.
Ministri i brendshëm i Bullgarisë Valentin Radev tha të enjten se Sofja do të hetojë 14 organizata, përfshirë kolegje dhe përfaqësues të tregtisë, për lidhje me lëvizjen e ashtuquajtur FETO të Turqisë, të udhëhequr nga kleriku në mërgim Fethullah Gylen – që Ankaraja fajëson për përpjekjen e dështuar të grushtit të shtetit në Turqi në vitin dhe e akuzon për terrorizëm.
Kërkesa turke për të hetuar grupet pasoi një takim midis Radev dhe homologut të tij turk, Sulejman Soylu, në Odrin të martën.
“Shërbimet e inteligjencës do të bëjnë një hetim dhe do të vendosin se çfarë duhet të bëjnë,”tha Radev, duke vënë në dukje se kërkesa për 14 organizatat do të përcillet “tek institucionet përgjegjëse”, raportoi Dnevnik.bg.
“Ne do të vazhdojmë të punojmë në një frymë marrëdhëniesh të fqinjësie së mirë dhe do të bëjmë të gjitha përpjekjet për të qenë të dobishme, por do të respektojmë ligjet bullgare,” shtoi ministri.
Bullgaria ka bashkëpunuar më parë me Turqinë në këtë çështje, në të paktën dy raste, duke dëbuar përkrahësit e dyshuar të Gylenit në Turqi.
Rasti i parë përfshinte ekstradimin e biznesmenit Abdullah Buyuk në verën e vitit 2016. Shtatë të ashtuquajturat gylenistë u arrestuan dhe u dëbuan në tetor 2016.
Në prill të këtij viti, Gjykata Europiane e të Drejtave të Njeriut kërkoi të gjitha dokumentet lidhur me ekstradimin e Buyukut.
Ndërkohë, Bosnja dhe Hercegovina konfirmoi të martën se autoritetet turke kishin arrestuar një shtetas boshnjak më 22 maj.
Konsullata në Stamboll dhe Ambasada e Bosnjës në Ankara “do të ofrojnë të gjithë ndihmën e mundshme për shtetasin e Bosnjës dhe familjen e tij”, tha Ministria e Jashtme.
Autoritetet në Turqi thanë se kishin arrestuar një student kinez dhe një student boshnjak në Turqinë perëndimore për lidhje të dyshuara me “Grupin Terror Gülenist, FETÖ” – pasi hetuesit thanë se kishin zbuluar se grupi i përdori të huajt për të fshehur gjurmët e tyre.
Gyleni ka mohuar fuqimisht mbështetjen e terrorizmit apo sponsorizimin e grushtit të dështuar të shtetit në Turqi, duke akuzuar qeverinë autoritare të vendit se po persekuton mbështetësit e tij.
