Biblioteka Kombëtare njoftoi se ka shpallur gjendjen e emergjencës dhe se po punon për rikuperimin e 12 mijë materialeve bibliotekare që u përmbytën të shtunën pas reshjeve të dendura të shiut.
Rreth 12 mijë libra, revista dhe gazeta janë dëmtuar nga uji që ka hyrë në një nga sallat e nëndheshme në ambientet e Bibliotekës Kombëtare pas reshjeve të fuqishme të shiut gjatë ditës së shtunë, raportuan mediat të hënën.
Ndërsa qytetarët vazhdojnë si zakonisht vizitat në Bibliotekën Kombëtare ata përballen me dyer të mbyllura dhe një lajmërim të shkurtër se biblioteka ka shpallur gjendjen e emergjencës dhe se do të qëndrojë e mbyllur deri më 30 qershor.
Mediat nuk u lejuan të hyjnë në Bibliotekë për të raportuar gjendjen, ndërsa zyrtarët e Bibliotekës Kombëtare dhe Ministria e Kulturës ishin të paarritshëm për të komentuar situatën.
Nga jashtë godinës mund të shihen disa libra të nxjerrë për t’u tharë në dritare, ndërsa në njoftimin për shtyp të bibliotekës janë shpërndarë gjithashtu imazhe të librave të lagur të hapur në sallat e leximit dhe peceta të përdorura për tharje.
Biblioteka lajmëroi se uji ka prekur librat e sistemuar në nivelet e ulëta të një salle të nëndheshme, kryesisht botime shkollore dhe tekste të 15 viteve të fundit të cilat nuk janë arritur të ruhen siç duhet prej mungesës së hapësirave depozituese, ndërsa bëri me dije se nuk ishte prekur fondi i vlerave të rralla dhe arkivi i librit dhe i periodikut shqip.
“Punonjësit vijojnë punën intensive për tharjen e plotë të pjesës së mbetur,” thuhej në njoftimin e bibliotekës.
Në mars të një viti më parë, Biblioteka Kombëtare humbi gjithashtu një pjesë të inventarit të saj për shkak të një zjarri që përfshiu një hapësirë të katit të dytë. Edhe atëherë stafi lajmëroi se botimet e prekura ishin ato të pas viteve ’90 dhe se dëmi nuk ishte i parikuperueshëm.
